देशकै सब}भन्दा सानो संसद कर्णाली प्रदेश सभामा कोरोना कोभिड १९ बाट जोगिदैं बजेट अधिवेशन सञ्चालन गर्ने तयारीमा तीव्रता आएको छ ।

कर्णाली प्रदेश सरकारले जेठ ११ गतेका लागि बैठकको आव्हान गर्न कर्णाली प्रदेश सरकारले प्रदेश प्रमुख गोविन्द कलौनीलाई सिफारिस गरेपनि हालसम्म प्रदेश सभामा उक्त पत्र भने आइपुगेको छैन ।

प्रदेश सभाका सचिव जीवराम बुढाथोकीका अनुसार प्रदेश सभाले तीन चरणमा बैठक सञ्चालनको तयारी सुरु गरेको हो । पहिलो चरणमा सचिवालयले प्रदेश सभा सदस्यहरूका लागि बस्ने कुर्सीको व्यवस्थापन गर्ने भएको छ । चालिस सदस्यीय प्रदेश सभामा हाल दर्शक दिर्घा पनि छुट्याइएको छ तर अब सामाजिक दुरी कायम गर्न कै लागि भएपनि उक्त दर्शक दिर्घा हटाउने तयारी सुरु भएको सचिव बुढाथोकीको भनाइ छ ।

‘प्रदेश सरकारका सामाजिक विकास मन्त्री दल रावल, स्वास्थ्य निर्देशनालयका निर्देशक रीता भण्डारी, कोरोना नियन्त्रणसँग सम्वन्धित डाक्टरहरूसँग व्यापक छलफल गरेका छौं । बैठक व्यवस्थापन गर्ने भन्ने बारेमा आवश्यक निर्णय भएको छ,’ सभामुख राजबहादुर शाहीले भने, ‘सामाजिक दुरी कायम हुने गरी कुर्सीहरू मिलान गर्ने, दर्शक दिर्घामा पनि माननीयका लागि फिक्स कुर्सी राख्ने व्यवस्था गर्ने भएका छौं ।’

अहिले प्रदेश सभा सचिवालयले बैठकमा आउने सबैकालागि आचारसंहिता निर्माण गरिरहेको बताउँदै जेठ सात गते अभिमुखिकरण कार्यक्रमको आयोजना गरिएको सभामुख शाहीको भनाइ छ ।

उनका अनुसार ४० जना प्रदेश सभा सदस्यहरू, सचिवालयका कर्मचारीहरू, मर्यादापालकहरू, मन्त्रीका ड्राइभर तथा पिएसओ तथा केहि पत्रकारको थ्रोव स्वाव जाँच गर्ने र अनिमात्र बैठक कक्षमा प्रवेश गर्न दिइने गरी तयारी अघि बढेको हो । नौ गतेसम्म सबै तयारी पुरा भइसक्ने सभामुख शाहीले जानकारी दिए ।