भारतको राजस्थानका मुख्यमन्त्री अशोक गहलोतले भारतीय जनता पार्टीलाई अहिलेको राजनीतिक संकटका लागि षड्यन्त्र गरेको र विधायक खरिदबिक्रीमा लागेको आरोप लगाएका छन् । 

पार्टीबाट निकालिएका सचिन पाइलटको हातमा केही पनि नभएको र भाजपाले पर्दापछाडिबाट खेल खेलिरहेको उनले बताए । 

‘भाजपाले लामो समयदेखि षड्यन्त्र गरेको र खरिदबिक्रीमा लागेकोले उच्च कमान्ड यो निर्णय लिन बाध्य भएको हो । यो ठूलो षड्यन्त्र हो भन्ने हामीलाई थाहा थियो । यसले गर्दा हाम्रा केही साथी भट्किए र यो दिल्लीसम्म पुग्यो,’ गहलोतले गभर्नर कलराज मिश्रलाई भेटेपछि भने ।
 

गहलोतले पाइलट र मन्त्रिपरिषद्का दुई अन्य मन्त्रीलाई बर्खास्त गरेका छन् । 

राजस्थान प्रहरीको स्पेसल अपरेसन्स ग्रूपले पाइलट तथा अन्य नेतालाई सरकार गिराउनका लागि षड्यन्त्र गरेको आरोपमा नोटिस पठाएपछि राजस्थानको राजनीतिक विवाद सतहमा आएको हो । 

पाइलटका समर्थकहरूले गहलोतको कदम निन्दनीय भएको बताए । 

पाइलटले १६ विधायकलाई साथै लिई राजस्थान बाहिर गएपछि शीर्ष नेताहरूले उनलाई फर्किन आह्वान गरे । तर उनले अटेरी गरिरहे । 

मंगलवारको बैठकमा पार्टी नेताहरूले विद्रोहीहरूमाथि कारवाही चलाएर कडा सन्देश दिन भने । बैठकलगत्तै पाइलटलाई राज्य इकाइ प्रमुख पदबाट हटाइएको थियो ।

पदबाट हटाइएपछि पाइलटले सत्यलाई हल्लाउन सकिने तर परास्त गर्न नसकिने भनी ट्वीट गरेका छन् । यससँगै उनले ट्विटरको बायोमा राजस्थानका उपमुख्यमन्त्री तथा राजस्थान कांग्रेस प्रमुख हटाएका छन् ।