दैलेखको चामुण्डा विन्द्रासैनी नगरपालिका वडा नं. पाँचको जनता माध्यमिक विद्यालय बस्तेकोट राजनीति गर्ने अखडा बनेको छ ।

नगर कार्यसमितिका सचिव जय बहादुर कार्की विद्यालयका सहायक लेखापाल तथा उनकै दाजु जनकबहादुर कार्की विद्यालयको प्रधानाध्यापक भएका कारण उनीहरुले सार्वजनिक सम्पतीको दुरुपयोग गर्दै विद्यालयमै निरन्तर कार्यक्रम गर्दै आइरहेका छन् ।

भदौ २० गते नेपाली काँग्रेसको क्रियाशील सदस्यता सम्बन्धीको बैठक पनि विद्यालय भित्रै गरेपछि स्थानीय आक्रोशित भएका हुन । नगर कार्य समिति सदस्य प्रेमबहादुर विष्ट र कार्की दाजुभाइका कारण उक्त विद्यालयमा काँग्रेसले राजनीति गर्दै आइरहेको छ । बारम्बार उक्त विद्यालयमा राजनीतिक कार्यक्रम हावी भइरहेको स्थानीयले नाम उल्लेख नगर्ने शर्तमा लोकान्तरलाई बताए ।

हिजो चुनावी र्‍याली निकाल्दा पनि विद्यालय बन्द गरेर विद्यार्थीलाई लैजाने विद्यालय यहि हो । श्रोत भन्छ, नेपाली काँग्रेसका अधिकांश कार्यक्रम विद्यालय समयमा, विद्यालयमा नै हुने गरेका छन् । यसले त्यहाँ भित्रको चर्को राजनीति र नातावाद प्रष्ट देखिएको छ । 

यता, प्रधानाध्यापक जनकबहादुर कार्कीले भने गल्ती भएको स्वीकार गरे । विद्यालयमा राजनीतिक आस्थाका आधारमा कार्यक्रम गर्न नपाइने नै हो । कानूनी रुपमा त्यस्तो व्यवस्था छैन । म सुर्खेत तिर भएका कारण त्यस्तो भएको होला । दाजुसँग पनि कुरा गरेको हो । सामाजिक सञ्जालमा तस्वीर राखिएको रहेछ । उनले भने, आगामी दिनमा त्यस्तो गल्ती दोहोरिदैन । यो दोश्रो पटक यस्तो गल्ती भएको हो । उनले बैठक कार्यालयमा नबसेर हलमा बसेको दाबीसमेत गरे ।