नेपालमा कोरोनाभाइरस (कोभिड- १९) संक्रमितको संख्या ६४ हजार १२२ पुगेको छ ।

स्वास्थ्य तथा जनसंख्या मन्त्रालयद्वारा आइतवार आयोजित नियमित पत्रकार सम्मेलनमा पछिल्लो २४ घण्टामा थप १३ सय २५ जनामा संक्रमण पुष्टि भएको जानकारी दिइएको हो ।

थपिएका संक्रमितमध्ये आधाभन्दा बढी काठमाडौं उपत्यकाका छन् ।

काठमाडौंमा ६ सय २, भक्तपुरमा १ सय १ र ललितपुरमा ६४ गरी ७ सय ६७ जनामा संक्रमण पुष्टि भएको मन्त्रालयले सार्वजनिक गरेको विवरणमा उल्लेख छ ।

संक्रमितमध्ये ४६ हजार २ सय ३३ जना निको भएर घर फर्किएको स्वास्थ्य मन्त्रालयका प्रवक्ता डा. जागेश्वर गौतमले जानकारी दिए ।

पछिल्लो २४ घण्टामा ९ सय ६६ जना डिस्चार्ज भएको प्रवक्ता गौतमले बताए ।

मृतकको संख्या भने ४ सय ११ पुगेको छ । पछिल्लो २४ घण्टामा १० जनाको मृत्यु भएको मन्त्रालयले जनाएको  छ।