आर्मेनिया र अजरबैजानले शान्तिवार्ता गर्नका लागि अन्तर्राष्ट्रिय समुदायले गरेको आह्वानलाई लत्याउँदै युद्ध जारी राखेका छन् । नागोर्नो–काराबाख क्षेत्रका लागि दुई मुलुकबीच भएको द्वन्द्व पूर्ण युद्धमा परिणत हुन लागेको छ । 
आआफ्नो सीमाबाट हातहतियार प्रहार गरेको भनी मंगलवार दुवै मुलुकले आरोपप्रत्यारोप गरे । 

यस द्वन्द्वले दक्षिणी ककेसस क्षेत्रको स्थिरताका विषयमा चिन्ता जन्माएको छ र यसमा टर्की र रुससमेत आमनेसामने हुने स्थिति बनेको छ । 
 

अजरबैजानका राष्ट्रपति इल्हाम अलीयेभले रुसको सरकारी टेलिभिजनसँग कुरा गर्दै वार्ताको सम्भावना पूरै नकारेका छन् । आर्मेनियाका प्रधानमन्त्री निकाले पाशिन्यानले युद्ध चलिरहँदा सम्झौताको कुनै सम्भावना नरहेको बताए । 
 

अजरबैजानभित्र रहेको नागोर्नो–काराबाख क्षेत्रमा आर्मेनियालीहरूको कब्जा छ । सन् १९९० को दशकमा भएको युद्धमा उक्त क्षेत्र अजरबैजानबाट चोइटिएको थियो तर यसलाई कसैले पनि स्वतन्त्र राष्ट्रको मान्यता दिएको छैन । 
 

आइतवारदेखि चलिरहेको द्वन्द्वमा लगभग १०० जना मारिएका र अन्य सयौंजना घाइते भएका छन् । 
 

शीतयुद्धकालसम्म सोभियत संघमा यी दुई मुलुक आबद्ध रहेका थिए । 
 

आर्मेनियाको हवाईक्षेत्रमा टर्कीको एफ–१६ लडाकू विमानले आफ्नो युद्धविमान खसाएको र पाइलट मारेको भनी आर्मेनियाले आरोप लगाएको छ । 

तर उसले यसको प्रमाण दिएन । टर्कीले यस दाबीलाई खारेज गरेको छ । 
 

अजरबैजानका सुरक्षाफौजलाई सहायता गर्न भाडाका सिपाहीहरू टर्कीले पठाएको आरोप पनि आर्मेनियाले लगाएको छ । 
 

पूर्णकालीन युद्ध भएमा टर्की मात्र नभई रुससमेत संलग्न हुन सक्छ । मस्कोले आर्मेनियासँग रक्षा साझेदारी गरेको छ तर अजरबैजानसँग पनि यसको राम्रो सम्बन्ध छ ।

मस्कोले टर्की, आर्मेनिया र अजरबैजान तीनै मुलुकसँग सम्पर्क गरेको छ । कुनै पनि शक्तिलाई सैन्य सहायता गर्दा आगोमा घ्यू थप्ने काम मात्र हुने उसले बुझेको छ ।