कांग्रेसले प्रदेश सभाको सोमवार बस्ने बैठक अवरुद्ध गर्ने भएको छ ।

सर्वदलीय बैठकमा सहमति नजुटेपछि बैठक अवरुद्ध गर्ने तयारी गरेको हो ।

प्रदेश सभामा प्रदेशको राजधानी दाङ र नामकरण सम्बन्धी प्रदेश सरकारले पेश गरेको प्रस्तावप्रति छलफल हुने कार्यतालिका छ । 

बैठक केहीबेरमा बस्दैछ । नेपाली कांग्रेसका सचेतक निर्मला क्षेत्रीले बैठकमा राजधानी र नामकरणको प्रस्तावको विषय हतारमा आएकाले यसलाई २–३ दिन पछाडि सार्न आग्रह गर्दा नेकपाले नमानेपछि बैठक अवरुद्ध गर्ने तयारी गरेको लोकान्तरलाई जानकारी दिइन् । 

उनले भनिन्, ‘प्रस्ताव एकाएक आयो । अध्ययन गर्न पनि पाइएन । १–२ दिन पछाडि सारेर केही बिग्रिँदैन भन्दा नेकपाले नमानेपछि बैठक अवरुद्ध गर्ने निर्णय कांग्रेसले गरेको छ ।’

सोमवारको बैठक चल्न नदिने क्षेत्रीले बताइन् । १२ बजे बैठक बोलाइए पनि अहिलेसम्म बस्न सकेको छैन ।