नेपाल कम्युनिस्ट पार्टी (नेकपा) संकट समाधानका लागि स्थायी कमिटी बैठकमा छलफल गर्ने निर्णय शनिवारको सचिवालय बैठकले गर्‍यो । तर प्रधानमन्त्री केपी शर्मा ओलीले विवादलाई तल्ला कमिटीमा लैजान चाहेका थिएनन् ।

ओली पक्षले सबै विवादहरू अध्यक्षद्वयबीच वा सचिवालय बैठकमै हल गरेर स्थायी कमिटीमा साझा प्रस्ताव लैजानुपर्ने कोसिस गरेको थियो । शनिवारको सचिवालय बैठकमा त्यही दृश्य देखियो ।

नेकपा वरिष्ठ नेता तथा पूर्व प्रधानमन्त्री झलनाथ खनालले शनिवारको सचिवालय बैठकका ४ घण्टा भोलि स्थायी कमिटी बैठक राख्ने कि नराख्ने मन्थनमै बितेका जानकारी दिए । यसअघि ओली पक्षका नेताहरू उपप्रधानमन्त्री ईश्वर पोखरेल, महासचिव विष्णु पौडेल र दलका उपनेता सुवासचन्द्र नेम्वाङले अध्यक्षद्वय मिलेर समाधान खोज्नुपर्ने र पार्टी बैठकहरू पर सार्नुपर्ने विषयमा प्रचण्डसँग छलफल गरेका थिए ।

शनिवारको सचिवालय बैठकमा समेत प्रधानमन्त्री ओलीले विवाद समाधान नभई स्थायी कमिटी बैठक राख्न नहुने अडान लिएका थिए । तर अर्का अध्यक्ष पुष्पकमल दाहाल ‘प्रचण्ड’, वरिष्ठ नेता झलनाथ खनाल, माधवकुमार नेपाल, उपाध्यक्ष वामदेव गौतम, प्रवक्ता नारायणकाजी श्रेष्ठले अडान लिएपछि बैठक राख्ने निर्णय भएको एक सचिवालय सदस्यले जानकारी दिए ।

आइतवार दिउँसो १ बजे पार्टी कार्यालय धुम्बाराहीमा स्थायी कमिटी बैठक बस्ने निर्णय भए पनि प्रधानमन्त्री ओली सहभागी हुनेमा शंका रहेको नेकपा स्रोतले जनाएको छ । ओलीका प्रस्तावबारे समेत छलफल गर्नुपर्ने भएकाले ओली सहभागी नभएको बैठक खल्लो हुने मत समेत नेकपामा छ । यसअघि मंसिर १७ गतेको सचिवालय बैठकमा ओली सहभागी नभएपछि शनिवारका लागि बैठक सारिएको थियो ।