परराष्ट्रमन्त्री प्रदीपकुमार ज्ञवाली छिमेकी मुलुक भारतको औपचारिक भ्रमणमा जाने भएका छ ।

भ्रमणका सम्बन्धमा औपचारिक मिति तय भइनसकेको भए पनि भ्रमणका लागि तयारी भइरहेको परराष्ट्र मन्त्रालयले जनाएको छ । “कार्यसूची तय गर्ने विषयमा काम गरिरहेको, सबै कुरा मिलेपछि भ्रमणमा जाने औपचारिक मिति तय हुनेछ,’’ मन्त्रालयका प्रवक्ता सेवा लम्सालले भने ।

प्रधानमन्त्री केपी शर्मा ओलीले धनगढीमा शुक्रवार आयोजित एक सार्वजनिक सम्बोधनमा परराष्ट्रमन्त्रीको भारत भ्रमण जनवरी १४ अर्थात् माघ १ गते हुने बताएका छन् । परराष्ट्रमन्त्रीको आसन्न भारत भ्रमणले सुदूरपश्चिम क्षेत्रको आर्थिक तथा सामाजिक विकासमा सकारात्मक प्रभाव पार्ने प्रधानमन्त्रीको भनाइ छ ।

प्राप्त जानकारीअनुसार भारत भ्रमणका क्रममा मन्त्री ज्ञवालीले नेपाल–भारत संयुक्त आयोगको बैठकमा भाग लिनेछन् । दुवै देशका परराष्ट्र मन्त्रीले संयुक्त रूपमा अध्यक्षता गर्ने सो बैठकमा उनले भारतका उच्च नेतृत्वसँग समेत भेटवार्ता गर्नेछन् ।

आयोगको बैठकमा दुई देशबीच सहकार्य भएका विविध परियोजना र अन्य अलमलमा परेका समस्याका विषयमा छलफल हुने सम्भावना औँल्याइएको छ । बैठकले परियोजनामा प्राप्त सफलता र गाँठो परेका विषय फुकाउने कार्यदिशा तय गर्नेछ । यस पटकको बैठकमा नेपाल–भारतबीच थाँती रहेका तथा सीमा समस्याका विषयमा समेत छलफल गर्ने तयारी गरिएको छ ।

मन्त्री ज्ञवालीले नै विभिन्न सार्वजनिक कार्यक्रममा त्यस विषयमा संयुक्त आयोगको बैठकमा कुरा उठाइने टिप्पणी गरेका थिए । जसअनुसार तत्काल समाधान गर्नुपर्ने देखिएको कालापानी, लिपुलेक, लिम्पियाधुरा क्षेत्रको विषयमा समेत बैठकमा कुरा हुनेछ ।

साथै भारतले उत्पादन गरेको कोभिड–१९ खोप नेपाल ल्याउनसमेत उनले आवश्यक पहल गर्नेछन्। सन् २०२० नोभेम्बरमा नेपाल भ्रमणमा आएका भारतका विदेश सचिव हर्षवद्र्धन शृङ्गलामार्फत भारतीय विदेशमन्त्री सुब्रमन्यम जयशङ्करले मन्त्री ज्ञवालीलाई भारत भ्रमणको निम्ता पठाएका थिए ।

सन् २०१९ मा संयुक्त आयोगको पाँचौँ बैठक नेपालमा बसेको थियो । यस पटकको बैठकमा गत बैठकमा समेत थाँती रहेको प्रबुद्ध व्यक्ति समूहको प्रतिवेदन बुझाउने विषयमा समेत थप छलफल हुने जनाइएको छ । भारतको लगानी रहेका विभिन्न जलविद्युत् आयोजना, जलस्रोत र यस क्षेत्रका समस्याबारे बैठकमा छलफल हुने औँल्याइएको छ । गोरखापत्र दैनिकमा खबर छ ।