कोरोना कहरका कारण सबैभन्दा प्रभावित पर्यटन उद्योगमा कोरोना खोप बिहीबार नेपाल भित्रिने समाचारले ठूलो राहत दिएको छ ।

नेपालका प्रमुख पर्यटकीय बजार भारत तथा चीन दुवै मुलुक कोरोनाका कारण लकडाउनमा परेपछि नेपालले पनि गत वर्षको चैत ११ गतेदेखि लकडाउन गरेको थियो । नेपालले अन्तर्राष्ट्रिय सीमा तथा अन्तर्राष्ट्रिय हवाइ सेवा बन्द गरेपछि स्थल तथा हवाई यातायातको प्रयोग गरी नेपाल आउने पर्यटकको संख्या ठप्प नै भयो । कोरोना अगाडि २० लाख पर्यटकलाई स्वागत गर्न आतुर मुलुकमा भएको अचानकको बन्दले नेपाली पर्यटन उद्योग नराम्ररी थला प-यो ।

बुधबार भारत सरकारले नेपाललाई कोरोना विरुद्ध प्रयोग हुने १० लाख डोज खोप अनुदानमा दिने निर्णयपछि भने नेपाली पर्यटन क्षेत्रमा एकप्रकारको आशा जागेको छ । होटेल संघ नेपालकी अध्यक्ष सिर्जना राणाका अनुसार पनि कोभिड–१९ को खोप नेपालमा आएसँगै यसले पर्यटन पुनरुत्थानमा ठूलो मदत पुग्नेछ । बुधबार स्वास्थ्य तथा जनसंख्या मन्त्री हृदयेश त्रिपाठी र नेपालका लागि भारतका राजदूत विनयमोहन क्वात्राले स्वास्थ्य तथा जनसंख्या मन्त्रालयमा संयुक्त पत्रकार सम्मेलन गरी भारतले नेपाललाई कोरोना विरुद्दको १० लाख डोज अनुदानको खोप बिहीबार नेपाल आइपुग्ने जानकारी दिएका छन् ।

मन्त्री त्रिपाठीले पहिलो चरणमा कोरोनाविरुद्धको खोप फ्रन्टलाइनमा खट्ने सरसफाईकर्मी, चिकित्सक, एम्बुलेन्स चालक, शव व्यवस्थापनमा संलग्न व्यक्ति, सुरक्षाकर्मी लगायतलाई दिइने बताए । खोपका लागि आवश्यक कानुनी, प्रशासनिक, आर्थिक तथा प्राविधिक सबै तयारी पूरा भइसकेको पनि उनले जानकारी दिए । मन्त्री त्रिपाठीका अनुसार यति खोपमात्रै पर्याप्त नभएकोले बाँकी खोप पनि नेपाल भिœयाउन खरिद प्रक्रिया अगाडि बढाउने सरकारको तयारी छ ।

यसअघि भारतमा यसै साताबाट खोप लगाउने काम राष्ट्रिय अभियानकै रूपमा अगाडि बढाइएको छ । जसबाट भारतीय पर्यटक अब नेपाल आउन सहज हुने विश्वास छ । राणाका अनुसार पनि मूलतः छिमेकी राष्ट्रहरूबाटै पर्यटक भिœयाउनका लागि सरकारले सहजता प्रदान गर्दै पर्यटन पुनरुत्थानमा आफूलाई केन्द्रित गर्नुपर्छ ।

नेपाल पर्यटन बोर्डका प्रमुख कार्यकारी अधिकृत डा. धनञ्जय रेग्मीका अनुसार पनि कोभिड–१९ को खोप छिमेकी राष्ट्र भारतलगायत अन्य देशमा सुरु भएसँगै नेपालमा पर्यटक आगमन बढ्दै जानेछ । “आन्तरिक र स्थलमार्गबाट आउने पर्यटकहरूबाटै पर्यटन क्षेत्रको पुनरुत्थान गर्नुपर्छ,” उनी भन्छन्, “धार्मिक पर्यटकहरूको लागि नेपालको मुख्य बजार मानिने भारतबाट आउनेहरूको संख्या पशुपति, लुम्बिनी, मुक्तिनाथ लगायतका क्षेत्रमा बढ्नेछ ।”
सन् २०२० मा नेपाल भ्रमण वर्षमार्फत २० लाख पर्यटक भिœयाउन आतुर नेपालको आशामा कोरोनाले तुषरापात गरेपछि जम्मा २ लाख ३० हजार ८५ पर्यटकले मात्रै नेपाल भ्रमण गरेको नेपाल पर्यटन बोर्डले जनाएको छ ।

त्यसमध्ये पनि सन् २०२० मा कोरोना कहरका कारण नेपालको प्रमुख पर्यटकीय गन्तव्य भारतबाट ४० हजार ३३६ र चीनबाट १९ हजार २५७ पर्यटक नेपाल आएको तथ्यांक छ । तर, सन् २०१९ मा भारतबाट २ लाख ५४ हजार १५० तथा चीनबाट १ लाख ६९ हजार ५४५ पर्यटक नेपाल आएको पनि बोर्डले जनाएको छ । कारोबार दैनिकमा दीपेन्द्र थापा र गोपाल संग्रौलाले खबर लेखेका छन् ।