नेपाल कम्युनिस्ट पार्टी (नेकपा) प्रचण्ड–नेपाल समूहका वरिष्ठ नेता झलनाथ खनालले पार्टी विवाद निरुपण नभई चुनाव हुन नसक्ने बताएका छन् ।

आफू पक्षीय नेकपा नै आधिकारिक भएको दाबी गर्दै अध्यक्षद्वय पुष्पकमल दाहाल ‘प्रचण्ड’ र माधवकुमार नेपालसहित निर्वाचन आयोग पुगेका नेता खनालले अहिले निर्वाचन प्रयोजनका लागि दल दर्ता नहुने बताए । 

‘हामी नै आधिकारिक हौं भनेर निर्वाचन आयोगमा दाबी पेश गर्‍यौं,’ आायोग परिसरमा सञ्चारकर्मीसँग कुरा गर्दै नेता खनालले भने, ‘दलको विवाद निरुपण नभई चुनाव हुन सक्दैन । दलहरू नै निर्वाचनका मुख्य खेलाडी हुन्, खेलाडी तयार नपारी निर्वाचन हुँदैन ।’

पार्टी आधिकारिकताको दाबी गर्दै नेपाल कम्युनिस्ट पार्टी (नेकपा) प्रचण्ड–नेपाल समूहका शीर्ष नेताहरू मंगलवार बिहान निर्वाचन आयोग पुगेका हुन् । अध्यक्षद्वय प्रचण्ड, नेपाल, वरिष्ठ नेता खनाल, स्थायी कमिटी सदस्यहरू लीलामणि पोखरेल, देव गुरुङ, घनश्याम भुसाल, वर्षमान पुन, राजेन्द्र पाण्डे लगायत नेताहरू आयोग पुगेका छन् ।

निर्वाचन आयोगले सोधेका प्रश्नको जवाफसहित आयोगमा जाने निर्णय सोमवार बसेको केन्द्रीय कमिटी बैठकले गरेको थियो ।

यसअघि निर्वाचन आयोगले नेकपा विभाजनसँगै छुट्टाछुट्टै गरेका निर्णयलाई वैधानिकता दिएको थिएन ।