नेकपा ओली समूहले आगामी फागुन १ गते बुटवलमा गर्ने जनसभा ऐतिहासिक बनाउने तयारी गरेको छ ।

नेकपा प्रदेश प्रचार विभागले बुटवलमा हुने सभाले ऐतिहासिक महत्त्व राख्ने भन्दै १ गतेको सभा देशलाई नयाँ दिशानिर्देश गर्ने खालको हुने ओली समूहको दाबी छ ।

सभामा २ लाख जनता सहभागी हुने नेकपा स्थायी कमिटी सदस्य तथा लुम्बिनी प्रदेशका मुख्यमन्त्री शंकर पोखरेलले जानकारी दिए । बुटवलमा बिहीवार आयोजित पत्रकार सम्मेलनमा उनले भने, ‘भन्नलाई २ लाख होइन । यर्थाथमै २ लाख जनता सहभागी हुनेछन् । १ लाख जनता रुपन्देहीका र १ लाख प्रदेशका विभिन्न जिल्लाबाट सहभागी हुनेछन् । बुटवलको सभा यथार्थमै ठूलो सभा हुनेछ ।’

सभा शुरू हुनुपूर्व अस्पताल लाइनको खाली जग्गामा जम्मा भएर राजमार्ग चौराहा हुँदै बुटवल–७ को सिद्धेश्वरी माविको खेल मैदानमा सभा हुनेछ ।

सभामा प्रधानमन्त्री केपी शर्मा ओली, महासचिव तथा अर्थमन्त्री विष्णु पौडेल, उद्योग वाणिज्य तथा आपूर्ति मन्त्री लेखराज भट्ट लगायतका नेताले सम्बोधन गर्नेछन् । पूर्व जनमुक्ति सेना पनि सभामा सहभागी हुने पोखरेलले बताए । 

प्रचण्ड–नेपाल समूहले माघ १५ गते बुटवलमा ठूलो सभा गरेपछि त्यसलाई काउन्टर दिन ओली समूहले पनि बुटवलमै ठूलो सभा लागेको हो । बुटवलको सभाले प्रचण्ड–नेपाल समूह हौसिएको थियो । 

बुटवलको सभालाई ओली समूहले आफ्नो शक्ति प्रदर्शनको रूपमा लिएको छ । ‘हाम्रो आन्दोलन होइन । जनमत प्रकट गर्ने कुरा हो । हामी त्यसैका लागि सभा सम्मेलन गर्दै आइरहेका छौं,’ पोखरेलले भने ।

सानो ठाउँमा सभा भए पनि विभिन्न ठाउँमा ‘डिस्पेले’ राखेर धेरैभन्दा धेरै जनतालाई नेताहरुको भाषण सुन्ने व्यवस्था मिलाइएको छ । 

मुख्यमन्त्री पोखरेलले नयाँ निर्वाचनबाटै देशमा आइपरेको संकट हल हुने बताएका छन् । ‘जनमतमा जाने कुरा लोकतन्त्रको आधारभूत पक्ष हो,’ मुख्यमन्त्री पोखरेलले भने, ‘हामी जनतालाई न्यायाधीश बनाउन चाहन्छौं । ओलीलाई तानाशाही भन्नेलाई चुनावले फैसला गरेर देखाउँछ ।’

ओलीले अहिले गरेको अभ्यास बलियो प्रधानमन्त्रीको लागि भएको पोखरेलले दाबी गरे । ‘प्रधानमन्त्रीलाई असफल बनाउने खेल अन्त्य गर्न निर्वाचनमा जानु परेको हो,’ उनले भने ।

नेकपा विवादको कारण प्रतिनिधिसभा विघटन भएको पोखरेलले तर्क गरे । उनले विवादको परिणाम प्रतिनिधिसभा विघटन भएको बताए । 

‘हाम्रा सभा सम्मेलन ओलीले अहिले चालेको कदम गलत होइन भन्ने हामी सन्देश जनतामा पुर्‍याउन चाहन्छौं । राज्यलाई चुनौती आउँदा सरकार पक्ष पनि जनतामा जानुपर्ने अवस्था आउँछ । सरकारलाई घेराबन्दीमा पर्न खोजेपछि हामी जनतामाझ जान खोजेका हौं,’ पोखरेलले भने ।