राष्ट्रपति विद्यादेवी भण्डारीले आर्थिक समानताबिना सामाजिक तथा सांस्कृतिक विभेदको अन्त्य हुन नसक्ने बताएकी छन् । 

१११औँ अन्तर्राष्ट्रिय महिला दिवसको अवसरमा महिला बालबालिका तथा ज्येष्ठ नागरिक मन्त्रालयद्वारा आयोजित कार्यक्रममा सम्बोधन गर्दै राष्ट्रपति भण्डारीले यसका लागि संविधानले मार्गदर्शन गरेको न्याय र समानतामा आधारित समाजवाद उन्मूख अर्थतन्त्र निर्माण गर्नुपर्नेमा जोड दिइन् । 

उनले ‘महिलाको सुरक्षा, सम्मान र रोजगारः समृद्ध नेपालको आधार’ भन्ने राष्ट्रिय संकल्पका साथ मनाउन लागिएको १११औँ अन्तर्राष्ट्रिय महिला दिवसको अवसरमा सम्पूर्ण दिदीबहिनीहरूमा सुख, शान्ति र समृद्धिको कामना समेत गरेकी छन् । 

राष्ट्रपति भण्डारीले महिला हक अधिकार स्थापित गर्न तथा महिला हिंसा न्यूनीकरण गर्न राष्ट्रिय तथा अन्तर्राष्ट्रिय स्तरमा विभिन्न प्रयासहरु भएको बताइन् । 

उनले भनिन्,‘हाम्रो देशमा संवैधानिक तथा कानूनी प्रावधान एवं नीति तथा कार्यक्रमहरू समेत राम्रोसँग निर्माण भएका छन् ।’

उनले यी प्रावधानहरुको प्रभावकारी कार्यान्वयन हुँदै जाँदा महिला समानता कायम गर्न तथा विभेदको अन्त्य गर्न महत्वपूर्ण योगदान पुग्ने विश्वास व्यक्त गरिन्  ।

‘विभेद अन्त्यका लागि राज्यका कार्यान्वयन गर्ने अङ्ग तथा निकायहरु सिर्जनात्मक रूपमा थप क्रियाशील हुनुपर्ने मैले आवश्यकता महसुस गरेको छु,’ उनले भनिन् ।

राष्ट्रपति भण्डारीले सरकारले लैङ्गिक विभेदको अवस्थालाई अन्त्य गर्ने उद्देश्यका साथ राष्ट्रिय लैङ्गिक समानता नीति–२०७७  जारी गरेको भन्दै सरकारलाई धन्यवाद दिइन् ।