एमाले अध्यक्ष एवं प्रधानमन्त्री केपी शर्मा ओलीले पार्टी वरिष्ठ नेता माधव नेपाल र उपाध्यक्ष भीम रावललाई ६ महिनाका लागि निलम्बन गर्ने गरी गरेको निर्णयप्रति एमाले (खनाल-नेपाल)पक्षले भर्त्सना गरेको छ ।

एमालेको तत्कालीन स्थायी कमिटीमा बहाल रहेका २३ मध्ये ११ नेताले संयुक्त वक्तव्य जारी गरी ओलीको उक्त निर्णय एमाले विभाजन गर्ने दुराशयबाट प्रेरित रहेको आरोप लगाएका हुन् । 

'वरिष्ठ नेता कमरेड माधवकुमार नेपाल र उपाध्यक्ष कमरेड भीम रावललाई विभिन्न झुठा लाञ्छाना लगाउँदै ६ महिनाका लागि पार्टी सदस्यबाट समेत निलम्बन गर्ने पार्टीको विधानविपरीत स्वेच्छाचारी कार्य भएको छ । यस्तो कार्य पार्टीभित्र विचार संगठनको सम्बन्धमा छलफल र बहसको ढोका बन्द गरी एमालेलाई विभाजन गर्दै छिन्नभिन्न पार्ने दुराशयकै परिणाम हो । यस्तो पार्टी विधान, पद्धति र मान्यता विपरीतको कार्यको हामी भर्त्सना गर्दछौं,' संयुक्त वक्तव्यमा भनिएको छ ।

चार नेतालाई सोधिएको स्पष्टीकरण पनि त्यही दुराशयको हिस्सा रहेको उनीहरूको आरोप छ ।

'सत्ता, शक्ति र स्रोतको उन्मादले ग्रसित केपी शर्मा ओलीद्वारा पार्टी विभाजनको रेखालाई फराकिलो बनाउने दुराशयबाट नवौं राष्ट्रिय महाधिवेशनद्वारा निर्वाचित वरिष्ठ नेता कमरेड माधवकुमार नेपाल, उपाध्यक्ष कमरेड भीम रावल, उपमहासचिव कमरेड घनश्याम भुसाल र स्थायी कमिटी सदस्य कमरेड सुरेन्द्र पाण्डेलाई अनेक झुठा आरोप लगाउँदै कथित स्पष्टीकरण सोधियो । त्यो उहाँको पार्टीभित्र अन्तरद्वन्द्व चर्काउने दुराशयको हिस्सा थियो,' उनले भने ।

वक्तव्यमा ओलीको निर्णयविरुद्ध र पार्टी हितमा एकताबद्ध भई लाग्न पार्टी पंक्तिलाई अपिल गरिएको छ ।

'केपी शर्मा ओलीबाट भएका उक्त प्रकारका देश, जनता र पार्टीको हित विपरीतका क्रियाकलापका विरुद्ध तथा पार्टीको क्रान्तिकारी सिद्धान्त र विचारको पक्षमा दृढतापूर्वक एकताबद्ध रूपमा संगठित भई देशव्यापी रूपमा सक्रिय हुन हामी नेकपा एमालेका सम्पूर्ण इमान्दार नेता/कार्यकर्ता र शुभेच्छुकमा आह्वान गर्दछौं,' वक्तव्यमा भनिएको छ ।