भारतमा खोप निर्माणका लागि आवश्यक कच्चा पदार्थमा अमेरिकाले रोक लगाएको छ र त्यस विषयमा केही पनि बोलिरहेको छैन । 

भारतको सिरम इन्स्टिच्युट अफ इन्डियाले कच्चा पदार्थको निर्यात प्रतिबन्ध हटाउनका लागि गरेको अनुरोधलाई अमेरिकी अधिकारीहरूले कुनै जवाफ फर्काएका छैनन् । 

अमेरिकाको यस्तो व्यवहारका कारण ऊ भारतको साँचो साथी हो र भन्ने विषयमा प्रश्न उठ्न थालेका छन् । चीनलाई घेर्नका लागि मात्र अमेरिकाले भारतको उपयोग गरिरहेको हो भनी केही विश्लेषकहरूले लेखेका छन् । 

अमेरिकाको व्यवहारका कारण भारतमा खोप कार्यक्रम प्रभावित भइरहेको छ । भारतमा हरेक दिन कोरोनाका केसहरू बढिरहेका छन् र मृत्यु पनि भइरहेको छ । 

सरकारले १८ वर्षभन्दा माथिका सबैलाई मे १ बाट खोप लगाउने घोषणा गरेको छ । खोप उत्पादन हुन सकेन भने भारतीयहरूलाई खोप लगाउन लामो समय कुर्नुपर्ने हुन्छ ।

यस विषयमा सञ्चारकर्मीले सोध्दा नेसनल इन्स्टिच्युट अफ एलर्जी यान्ड इन्फेक्सियस डिजीजेजका निर्देशक डा एन्थोनी फाउचीले आफूलाई केही थाहा नभएको बताए । 

ह्वाइट हाउसकी प्रेस सचिव जेन पिसाकीले पनि यस विषयमा सीधासीधा उत्तर दिइनन् ।