कोरोना भाइरसको महामारीबाट अति प्रभावित मुलुक साइप्रसमा फेरि लकडाउन लागू हुने भएको छ । 

सरकारले अहिले फेरि घोषणा गरेको लकडाउन अप्रिल २६ तारिखदेखि लागू हुने अधिकारीहरूले जानकारी दिएका छन् । 

कोरोना भाइरसको महामारी फेरि तीब्र रूपमा फैलिएर धेरै मानिस संक्रमित हुने र धेरैको मृत्यु हुने गरेकाले फेरि लकडाउन लगाउनुपरेको सरकारले जनाएको छ । 

खाद्य तथा पेय पदार्थ बिक्री वितरण गर्ने पसललगायत सबै व्यावसायिक स्थल तथा कार्यालयहरू बन्द गरिने निर्णय भएको एक मन्त्रीले जानकारी दिएका छन् । 

होटल, रेस्टुरेन्ट, वार, क्याफे, सैलुन, ब्युटीपार्लर, जिम तथा डान्स स्कूलहरू पनि बन्द गर्ने निर्णय भएको उनले बताए । स्थानीय समय अनुसार राति ९ बजेदेखि बिहान ५ बजेसम्म कफ्र्यु समेत लागू हुने अधिकारीहरूले जानकारी दिएका छन् ।

लकडाउनको बेलामा थियटर र चलचित्र घरहरू समेत बन्द गरिने भएको छ ।

भीडभाड गर्न तथा भेला हुन प्रतिवन्ध लगाउन थालिएको छ भने कतै हिँड्नुपर्नेमा अत्यावश्यक परेकाहरूलाई मात्रै अनुमति दिइने भएको छ । कामदारहरूलाई सकेसम्म निवासबाटै काम गर्न वा काम गर्ने ठाउँमै बस्न प्रोत्साहन गर्ने नीति सरकारले लिएको छ ।