अभद्र व्यवहार कसुरमा प्रहरीले उर्लाबारी नगरपालिकाका मेयर खड्ग फागोलाई ‘फरार आरोपी’ को सूचीमा राखेको छ ।

उर्लाबारी–९ का नारायण भनिने टंकबहादुर बस्नेतले अभद्र व्यवहार कसुरमा जाहेरी दिएपछि प्रहरीले मेयर फागोसहित उनका भतिजो दुर्गा फागोलाई ‘फरार’को सूचीमा राखेको हो । 

गत चैत ३० गते नगरपालिका परिसरमै बस्नेतलाई निर्घात कुटपिट गरेका मेयर फागो र उनको भतिजोलाई आरोप लाग्दै आएको छ ।

उर्लाबारी–५ का विष्णुप्रसाद भण्डारीको रोकिएको टहरा संरचनाको विषयमा सहजीकरण गर्न नगरपालिका पुगेका बस्नेतमाथि मेयर र उनका भतिजोले निर्ममतापुर्वक आक्रमण गरेको प्रत्यक्षदर्शी प्रेम बास्तोलाले बताए । सख्त कुटपिट भएका बस्नेतलाई उद्धार गर्नुको साटो प्रहरीले उल्टै नियन्त्रणमा लिएर अभद्र व्यवहारमा मुद्दा चलाएको थियो ।

विधिको शासन भएको मुलुकमा कानून हातमा लिने छुट कसैलाई नभएपनि ‘स्थानीय सरकारकै प्रमुख’लाई नियन्त्रणमा लिएर मुद्दा अभियोजन गर्न सकस परेको एक प्रहरीले नाम उल्लेख नगर्ने सर्तमा बताए । इप्रका उर्लाबारीका प्रमुख प्रहरी निरीक्षक राजाराम खड्काले उजुरी दर्ता भएको स्वीकार्दै भने– ‘आरोपीलाई कानुनको दायरामा ल्याउन कटिबद्ध छौ ।’

यद्यपि मेयर र उनका भतिजोलाई कहिले नियन्त्रणमा लिनुहुन्छ ? भन्ने प्रश्नमा खड्काले अनुसन्धानकै चरण भएकोले केहि बताउन नमिल्ने जनाए । यस्तै, १ नम्बर प्रदेश प्रहरी कार्यालयका प्रहरी नायब महानिरीक्षक ईश्वरबाबु कार्कीले घटनाबारे आफु अनभिज्ञ रहेको जनाउदै बुझेर प्रतिक्रिया दिने बताए ।