भक्तपुर नगरपालिकाले सोमवार मिठाई पसलको अनुगमन गरेको छ ।

नगरपालिका अनुगमन समितिका संयोजक राजकृष्ण गोराको नेतृत्वमा नःपुखु, बुलुचा, साकोठा, सुकुलढोका, जगाती र चोखामा मिठाई पसल अनुगमन गरिएको छ ।

मंगलवार मातातीर्थ औंशीलाई ध्यानमा राखी मिठाई पसल नखोल्न र नबनाउन अनुरोध गर्दै अनुगमन गरिएकोे संयोजक गोराले बताए । अनुगमनमा मिठाई पसल खोलेकाहरूलाई जरिवाना गरिएको र अखाद्य मिठाई नष्ट गरिएको उनले बताए ।

सुकुलढोकाको श्रेष्ठ मिठाई पसल र जगातीका २ मिठार्ई पसल अनुगमन टोली पुगेको थाहा पाएर भागेका थिए । दिव्य स्वीट्समा रङ बढी हालिएको मिठाई जफत गरी नष्ट गरिएको छ ।

नवदूर्गा स्वीट्स एण्ड चाट हाउसमा भान्छा एकदम फोहर भएको पाइयो । तराजु १ थान जफत गरी ३ दिनभित्र कार्यालयमा उपस्थित हुन निर्देशन दिइएको र रङ बढी भएका जेरी र लड्डु जफत गरी नष्ट गरिएको छ ।

दिनेशको मिठाई पसलमा रङ बढी भएको मिठाई नष्ट गरिएको छ । तराजू एक थान जफत गरी पसल नवीकरण गर्न र ३ दिनभित्र कार्यालयमा उपस्थित हुन निर्देशन दिइएको छ ।

श्रीरामको मिठार्ई पसल ३ दिनभित्र दर्ता गर्न निर्देशन दिँदै रङ बढी भएको मिठाई जफत गरी नष्ट गरिएको बजार निरीक्षक रामकृष्ण प्रजापतिले बताए ।