नेपालमा कोरोनाभाइरस कोभिड १९ का सक्रिय संक्रमितको संख्या १ लाख नाघेको छ ।

पछिल्लो २४ घण्टामा ९ हजार ३ सय ५ संक्रमित थपिएसँगै सक्रिय संक्रमितको संख्या १ लाख १ हजार ६ सय ३४ पुगेको हो ।

संक्रमितमध्ये ९४ हजार ३ सय ४३ जना होम आइसोलेसन र ७ हजार २ सय ९१ जना संस्थागत आइसोलेसनमा रहेको स्वास्थ्य तथा जनसंख्या मन्त्रालयले जनाएको छ ।

पीसीआरतर्फ २० हजार २ सय ६२ र एन्टीजेनतर्फ ४ सय २४ नमूना परीक्षण गर्दा पीसीआरतर्फ ९ हजार २ सय ३८ र एन्टीजेनतर्फ ६७ जनामा संक्रमण पुष्टि भएको छ ।

पछिल्लो २४ घण्टामा १ सय ६८ जनाले ज्यान गुमाएको मन्त्रालयका प्रवक्ता डा. जागेश्वर गौतमले जानकारी दिए ।

काठमाडौं उपत्यकामा मात्र ३ हजार ९ सय २४ संक्रमित थपिएका छन्, जसमध्ये काठमाडौंमा ३ हजार २ सय ५०, ललितपुरमा ४ सय ४८ र भक्तपुरमा २ सय २६ जना छन् ।

मन्त्रालयका अनुसार पछिल्लो २४ घण्टामा ४ हजार ४ सय ४४ जना संक्रमणमुक्त भएका छन् ।