काँग्रेस सभापति शेरबहादुर देउवाले कोरोना संक्रमण भयावह बन्दै गएको भन्दै मित्रराष्ट्र  अन्तर्राष्ट्रिय समूदायसँग सहयोग मागेका छन् । 
प्रमुख प्रतिपक्षी दलका नेता समेत रहेका सभापति देउवाले यस विषम घडीमा नेपाललाई आवश्यक सहयोग गर्न मित्रराष्ट्र र अन्तर्राष्ट्रिय संघ, संस्थासँग अपिल गरेका हुन् । 

कोभिड—१९ को संक्रमणले उग्र रुप लिँदा देशभरिका अस्पतालहरुमा अक्सीजन, भेन्टीलेटर सहितका आईसीयू बेड र औषधीको  अभाव भइरहेको देउवाले उल्लेख गरेका छन् । 
उनले अहिलेको गम्भीर अवस्थामा सरकार भने गम्भीर र जिम्मेवार नदेखिएको आरोप समेत लगाएका छन् । 

‘सुदूरपश्चिम लगायतका दुर्गम स्थानहरु र देशभरिमा नै अक्सीजन अभावले ठूलो संख्यामा मानिसको मृत्यु भईरहेको छ । सरकार यस विषयमा अहिलेसम्म पनि गम्भीर र जिम्मेवार देखिएको छैन’, देउवाले शुक्रबार जारी गरेको विज्ञप्तिमा भनिएको छ, ‘म सरकारसँग भविष्यमा आउन सक्ने जटिल परिस्थितिलाई मध्यनजर गरि सबै जिल्लामा अक्सीजन प्लान्ट र पीसीआर परिक्षण प्रयोगशाला स्थापना गर्न र तत्कालका लागि आवश्यक अक्सीजन, आईसीयू बेड, खोप लगायतका औषधीको  व्यवस्था गर्न माग गर्दछु ।’

देउवाले सबै देशबासीमा स्वास्थका मापदण्ड अपनाउन, आफु र आफ्नो परिवारलाई सुरक्षित अनुरोध गरेका छन् ।