मौद्रिक नीतिको तेस्रो त्रैमासिक समीक्षा : स्वास्थ्य सेवामा सकारात्मक प्रभाव पर्ने परिसंघको विश्वास

नेपाल उद्योग परिसंघले नेपाल राष्ट्र बैंकले चालु आर्थिक वर्षको मौद्रिक नीतिको तेस्रो त्रैमासिक समीक्षामार्फत केही प्रावधानमा हेरफेर गरेको उल्लेख गर्दै जसका कारण मुलुकको स्वास्थ्य सेवामा सकारात्मक प्रभाव पर्ने विश्वास लिएको छ । 
परिसंघले मंगलबार जारी गरेको विज्ञप्तिमा केन्द्रीय बैंकले यसअघि तोकका विभिन्न दररेटलाई यथावत राखेको र निषेधाज्ञाको अवधिमा कर्जा असुलीमा कुनै शुल्क वा जरिवाना नहुने व्यवस्थाले उद्योग व्यवसायलाई केही सहज हुने आफूहरुको बुझाइ रहेको उल्लेख गरिएको छ । 

यस्तै उद्योगहरूले अक्सिजन प्लान्ट स्थापना गर्न चाहेमा अधार दरमै कर्जा दिने व्यवस्था समेत उल्लेख भएकाले यस प्रकारको प्रोत्साहनले अक्सिजन उपलब्धताको दीर्घकालीन व्यवस्थापन गर्न सहयोग पुग्ने परिसंघले विश्वास लिएको छ । 
हालको परिप्रेक्ष्यमा चालु आर्थिक वर्षको मौद्रिक नीतिले उद्योग व्यवसाय सञ्चलनमा उल्लेख्य भूमिका खेलेको समेत परिसंघले जनाएको छ । 

मुलुकको समग्र आर्थिक क्षेत्रलाई चलायमान बनाउँदै रोजगारी सिर्जना गर्न, ग्राहस्थ उत्पादन बढाउन तथा समग्र आर्थिक वृद्धि गर्न केन्द्रीय बैंकले आगामी आर्थिक वर्षको मौद्रिक नीतिमार्फत मुलुकको औद्योगिक तथा व्यवसायिक क्षेत्रलाई थप सहुलियत उपलब्ध गराउने समेत परिसंघले विश्वास लिएको छ ।