कोरोना संक्रमणको दोस्रो लहरबाट सबैभन्दा बढी प्रभावित लुम्बिनी प्रदेशमा संक्रमण दर ह्वात्तै घट्न थालेको छ । 

संक्रमणको ‘हटस्पट’ बनेको बाँके, रूपन्देही र दाङलगायतका जिल्लामा ६० प्रतिशत भन्दा बढीले संक्रमण घटेको तथ्यांकले देखाएको छ । 

बेड अभावले अस्पतालको भुइँ र गल्लीमा समेत बिरामी भरिभराउ थिए । अहिले आईसीयू बेड समेत खाली हुन थालेका छन् । चार अंकमा पुगेको संक्रमण अहिले दुई अंकसम्म झरेको छ ।

२ अंकबाट मृत्यु १ अंकतर्फ ओरालो लागेको छ । कोरोनाको दोस्रो लहर लुम्बिनीको बाँकेबाट शुरू भएको थियो । वैशाख १० गतेदेखि बाँकेमा सुनामीको रूपमा फैलिएको संक्रमण जेठ दोस्रोबाट कम हुन थालेको देखिन्छ । 
आइतबार बाँकेमा सबैभन्दा कम १२ जनामा संक्रमण देखियो भने रुपन्देहीमा ५१ जनामा संक्रमण पुष्टि भएको छ । ५ जनाको मृत्यु भएको छ ।

बाँकेमा यो कोरोनाको दोस्रो लहर शुरू भएपछिकै कम संक्रमण हो । बाँकेमा पनि गएराति ५ जनाको मृत्यु भएको छ । 

वैशाख तेस्रो सात रुपन्देहीमा एकै दिन १ हजार १०० र बाँकेमा १ हजार जनामा समेत संक्रमण पुष्टि भएको थियो । 

बुटवलस्थित लुम्बिनी प्रादेशिक अस्पतालको मातहत धागो कारखानामा सञ्चालित कोभिड अस्पतालका १४ वटा आईसीयू बेडमध्ये ३ वटा अहिले खाली छन् । 

त्यस्तै अस्पतालकै ३६ वटा एचडीयू शय्यामध्ये १० वटा खाली छन् ।  

अस्पतालका सूचना अधिकारी डा. विष्णु गौतमले भने, ‘पछिल्लो ५/६ दिनयता अस्पतालमा बिरामीको चाप ह्वात्तै घटेको बताए ।

‘आईसीयूमा पुरानै बिरामी उपचाररत छन्,’ डा. गौतमले लोकान्तरसँग भने, ‘आकस्मिक कक्षका ३९ बेडमा ६० भन्दा बढी बिरामी हुन्थे । भुइँमा डाक्टर हिँड्ने बाटो समेत हुँदैनथ्यो । अहिले इमरजेन्सीको एउटा बेडमा एक मात्र बिरामी छन् ।’ 

गौतमले थपे, ‘परीक्षणमा त्यति कमी आएको छैन । तर, कोरोना देखिने दरमा कमी आएको छ । यसले अब संक्रमण ‘पिक आवर’ मा पुगेर ओरालो लागेको हो कि भन्ने देखिन्छ । तर, यो ढुक्क हुने अवस्था चाहिँ होइन ।’
भैरहवाको भीम अस्पतालमा पनि बिरामीको चाप अहिले छैन । 

पालिकाहरूले बनाएको अक्सिजनसहितको आइसोलेसन सेन्टरहरूमा पनि संक्रमण थपिएको छैन ।

बाँकेको भेरी अस्पतालका २०० बेडमध्ये २० बेड खाली छन् । नेपालगञ्ज मेडिकल कलेज १३० बेडमध्ये ८० बेड खाली छन् ।

युनाइटेड अस्पतालका १९ बेडमध्ये ८ बेड खाली रहेका छन् । 

बाँकेका कोभिड फोकल पर्सन नरेश श्रेष्ठले पछिल्लो एक सातायता संक्रमण निरन्तर घटेको बताए । ‘दैनिक मृत्यु १७/१८ सम्म पुगेको थियो, अहिले ४/५ जनासम्म छ । अब मत्थर भएजस्तो देखिन्छ । सबैभन्दा बढी डरलाग्दो अवस्थामा पुगेको बाँकेले एक महिना एकदमै अप्ठ्यारो स्थिति भोग्नुपर्‍यो । अहिले सामान्यतर्फ गएको हो कि भन्ने संकेत छ,’ श्रेष्ठले लोकान्तरसँग भने । 

बाँकेमा कोरोनाको दोस्रो लहरबाट २९२ जनाको मृत्यु भएको छ । जटिल अवस्थामा पुगेपछि बल्ल अस्पतालको सम्पर्कमा आउँदा मृत्यु बढी हुन पुगेको श्रेष्ठ बताउँछन् । बाँकेका तीनवटा कोभिड प्रयोगशालाबाट अहिले दैनिक ३५० देखि ४०० जनाले परीक्षण गराउँदै आएका छन् । रुपन्देहीमा ४२० जनाको संक्रमणबाट मृत्यु भएको छ भने २ हजार ८३३ जना संक्रिय संक्रमित छन् । 

कपिलवस्तुमा पनि संक्रमण घटेको छ । कोरोनाको पहिलो लहरबाट कपिलवस्तु सबैभन्दा बढी प्रभावित भएको थियो । जिल्ला स्वास्थ्य कार्यालय रुपन्देहीका प्रमुख डा.  राजेन्द्रकुमार गिरीले संक्रमण तीव्र रूपमा घट्ने क्रममा रहेको बताए । 

‘अहिले बाक्लो बस्तीमा एन्टिजेन परीक्षण बढाउँदै छौं । टेन्ट कम हुँदा पनि पोजेटिभिटी कमै देखिनु संक्रमणमा घटेको संकेत हो ।’ 

बुटवल र तिलोत्तमामा अब एन्टिजेन परीक्षण तीब्र बनाइँदै छ । रुपन्देहीमा संक्रमण २५ हजारभन्दा माथि छ । यहाँका अस्पतालहरुमा मृत्यु हुनेहरू पनि पहाडी जिल्लाबाट उपचारको लागि झरेकाहरू छन । अहिले पहाडमा संक्रमण तराईको तुलनामा बढेको छ । अहिले अक्सिजनको हाहाकार पनि छैन ।