बार्सिलोना क्लबका सुपरस्टार खेलाडी लियोनल मेसीले क्लबसँग थप पाँच वर्षको सम्झौता गरेका छन् । 

कम तलब लिएर उनी क्लबमा बस्न सहमत भएको विभिन्न सञ्चारमाध्यममा समाचार आएका छन् । 

मेसी बार्साका सर्वाधिक गोलकर्ता खेलाडी हुन् । विगत २१ वर्षदेखि क्लबमा जोडिएका मेसीको सम्झौता गत जुन महिनामा सकिएको थियो र उनी अहिले फ्री एजेन्ट हुन् । 
 

जोआन लापोर्ता क्लबको अध्यक्ष बनेदेखि तलब घटाएर भए पनि मेसीलाई राखिरहने मिसन बनाएका छन् । ला लिगाको कठोर आर्थिक नियन्त्रण नियमभित्र क्लब बस्नेछ । 

ला लिगाका प्रमुख जाभिएर टेबासले बार्सिलोनालाई कुनै छुट नदिइने बताएका छन् । क्लबलाई एक अर्बभन्दा बढीको ऋण छ । 

मेस्सीले पछिल्लो सम्झौता सन् २०१७ मा हस्ताक्षर गरेका थिए । एल मुन्डो पत्रिकाका अनुसार, त्यो सम्झौता विश्व खेलकुदकै सबभन्दा ठूलो रकम हो । 

क्लबले खेलाडीहरूको समूह तयार पारिरहेको छ । जुनियर फिर्पो, जीन–क्लेयर टोडिबो र कार्लेस आलेनालाई बेच्न खोजेको छ । अनि सर्जियो अग्वेरो, मेम्फिस डिपे र एरिक गार्सियालाई सित्तैमा भित्र्याएको छ ।