लुम्बिनी प्रदेशका मुख्यमन्त्री शंकर पोखरेल प्रदेशसभा संसद भवन छाडेर बाहिरिएपछि बजेटबारे छलफल भइरहेको प्रदेशसभा बैठक प्रभावित भएको छ ।

साँझ ५ बजे आधा घण्टाका लागि स्थगित भएको लुम्बिनी प्रदेशसभा बैठक शुरू हुन सकेको छैन । बैठक साढे ५ बजेसम्मका लागि स्थगित गरिएको थियो ।

सत्ता पक्षीय सांसद, मन्त्री र मुख्यमन्त्री नै बजेट निर्णयार्थ प्रस्तुत हुने बेला संसदबाट बाहिरिएपछि सभामुखले आधा घण्टाका लागि बैठक स्थगित गरेका थिए ।

छलफलमा सबै मन्त्रीहरू सहभागी भएका थिए । संसद बहिष्कार गरेपछि सभामुख पूर्णबहादुर घर्तीले प्रतिपक्षसँग छलफल गर्न आधा घण्टाका लागि सदन स्थगित गरेका थिए । 

छलफलको समय साढे ५ बजे सकिएको भए पनि मुख्यमन्त्री पोखरेल संसद भवन नै छाडेर बाहिरिएपछि  बैठक शुरू हुन नसकेको जनाइएको छ ।

सदन शुरू नभएपछि विपक्षी गठबन्धनले ६ बजे पत्रकार सम्मेलन गर्ने भएका छन् । बजेट निर्णयार्थ प्रस्तुत हुनुभन्दा छलफलका लागि समय माग गरे पनि समय नपाएपछि आफूहरू बैठक छाडेर निस्किएको नेकपा एमालेका प्रमुख सचेतक भूमिश्वर ढकालले बताए ।

बिहीवारको बैठकमा सत्तापक्षीय सांसद अजयबहादुर शाही उपस्थित छैनन् । यतिबेला बजेट निर्णयार्थ पेश भएमा असफल हुने देखेर एमालेले बहिष्कार गरेको विपक्षीको आरोप छ ।