नेकपा एमाले फुटाउने उद्देश्यले प्रधानमन्त्री शेरबहादुर देउवाले आजै विश्वासको मत लिन लागेको एमाले नेता भीम आचार्यले आरोप लगाएका छन् ।

एमालेमा माधव नेपाल र झलनाथ खनाल समूहमा रहेका आचार्यले प्रधानमन्त्रीलाई विश्वासको मत लिन एक महिनाको समय हुँदाहुँदै अहिल्यै एमाले फुटाउने उद्देश्यले विश्वासको मत लिन लागेको प्रतिक्रिया दिएका हुन् । 

‘विश्वासको मतको लागि अझै प्रशस्त समय थियो । अरू विकल्प पनि हुन सक्थे तर, अहिल्यै विश्वासको मत लिन खोज्नु भनेको पार्टी फुटाउने एउटै उद्देश्य हो,’ उनले भने । 

कोटेश्वरमा माधव नेपाल निवासमा आन्तरिक छलफल सकेर बाहिरिने क्रममा सञ्चारकर्मीहरूलाई प्रतिक्रिया दिँदै आचार्यले भने, ‘१० बुँदे सहमति गरेर पार्टी एकता कायम गर्न लागेको बेला कुत्सित मनसाय राखेर पार्टी फुटाउने उद्देश्यले विश्वासको मत लिन खोजिएको छ । यो षड्यन्त्र हो ।’

विश्वासको मत दिनेबारे एमालेको नेपाल समूहमा कुनै छलफल नभएको र कसैले विश्वासको मत दियो भने त्यो व्यक्तिगत निर्णय हुने उनले बताए । आचार्य आफैं भने प्रधानमन्त्री शेरबहादुर देउवालाई विश्वासको मत दिन नहुने पक्षमा छन् । 

कसैले विश्वासको मत दिए भने माधव–खनाल समूहको आधिकारिक निर्णय नहुने आचार्यको भनाइ छ ।