जनता समाजवादी पार्टी (जसपा)को आधिकारिकता सम्बन्धी निर्वाचन आयोगको निर्णयविरुद्ध जसपाको महन्थ ठाकुर ठाकुर पक्षले सर्वोच्च अदालतमा रिट दायर गरेका छन् ।

निर्वाचन आयोगले साउन ११ गते उपेन्द्र यादव पक्षलाई आधिकारिकता दिनेसम्बन्धी निर्णय गरेको थियो ।

यसअघि निर्वाचन आयोगले सनाखत गर्न साउन ११ गते आयोगमा आउन जसपाका कार्यकारिणी समिति सदस्यलाई भनेको थियो ।

त्यसविरुद्ध पनि महन्थ पक्षले सर्वोच्चमा रिट दायर गरेको थियो ।

तर न्यायाधीश कुमार रेग्मीको इजलासले तत्काल अन्तरिम आदेश दिन अस्वीकार गर्दै अन्तरिम आदेशबारे छलफल गर्न निर्वाचन आयोग र विवादरत दुवै पक्षलाई बोलाउने आदेश गरेको थियो ।

तर निर्वाचन आयोगले त्यसअघि नै साउन ११ गते उपेन्द्र यादवलाई बहुमत कार्यकारिणी समिति सदस्यले गरेको सनाखतका आधारमा दलको आधिकारिकता दिएको थियो।

सोही निर्णयविरुद्ध ठाकुरले सर्वोच्चमा दोस्रो रिट दर्ता गराएका हुन्।

उक्त निर्णयलाई कार्यान्वयन गर्दा पार्टी नै विभाजित हुने तथा केन्द्रीय नेतृत्वको प्रयोजन नै समाप्त हुने भएकाले रिट निवेदनको अन्तिम टुंगो नलागेसम्म निर्वाचन आयोगले साउन ११ गते गरेको निर्णय कार्यान्वयन नगर्नू, नगराउनू भन्ने आदेश माग गर्दै महन्थले रिट दायर गरेका हुन् ।