१० बुँदे सहमतिको आधारमा पार्टी एकतालाई निष्कर्षमा पुर्‍याउने माधव नेपाल पक्षको निर्णय, ४ बुँदे प्रस्ताव पारित गर्दै सकियो बैठक

असार २७ गते भएको १० बुँदे सहमतिलाई एकताको आधार मान्दै थप प्रयास गर्ने निर्णय गर्दै नेकपा एमालेको माधव नेपाल पक्षको केन्द्रीय कमिटीे बैठक सकिएको छ । 

४ बुँदे निर्णय गर्दै बैठक सकिएको स्थायी कमिटी सदस्य रघुजी पन्तले जानकारी दिए । बिहीवारदेखि शुरू भएको बैठकले सर्वोच्च अदालतले प्रतिनिधि सभा पुनःस्थापना गरेकोमा स्वागत गरेको छ । 

बैठकले १० बुँदे सहमतिको भावनाविपरीत वरिष्ठ नेता नेपालमाथि अनेकौँ टिप्पणी गरिएकोमा विरोध जनाएको छ । बैठकले पार्टी एकताको लागि वार्ता चलिरहेको समयमा अधिवेशन र सदस्यता नवीकरणको काम रोक्न माग गरेको छ । 

१० बुँदे सहमतिलाई आधार मानेर एकता प्रक्रिया अगाडि बढाउने निर्णय भएको नेता पन्तले बताए । ‘हाम्रो अडान सम्मानजनक पार्टी एकता हो, यसका लागि प्रयास जारी राख्ने सहमति भएको छ,’ पन्तले भने । 

पार्टी एकताको पक्षमा निर्णय गर्न केन्द्रीय सदस्यहरूले स्थायी कमिटीलाई जिम्मा दिएको छ ।