दर्ता नभएका ई–रिक्सालाई कारवाही गर्न मजदुर संगठनको माग

नेपाल यातायात स्वतन्त्र मजदुर संगठनले बुटवल उपमहानगरपालिकामा दर्ता प्रक्रियामा नआउने विद्युतीय रिक्सा (ई–रिक्सा) कारवाहीको प्रक्रिया अगाडि बढाउन ट्राफिक प्रहरीलाई आग्रह गरेको छ । 

संगठनले शुक्रवार लुम्बिनी प्रदेश ट्राफिक प्रहरी कार्यालय बुटवलका प्रमुख प्रहरी उपरीक्षक (एसपी) योगेन्द्रसिंह थापालाई ध्यानाकर्षण पत्र बुझाउँदै अटो रिक्साको अविलम्ब व्यवस्थापन गरी बुटवललाई स्वच्छ र दुर्घटनारहित बनाउन आग्रह गरेको हो । 

ज्ञापनपत्र बुझाउँदै संगठनका प्रदेश अध्यक्ष कृष्ण कँडेलले बुटवल शहरलाई स्वच्छ र दुर्घटनारहित बनाउन कार्यविधिअनुसार नचलेका रिक्सालाई नियमन गरी कारवाही गर्न आग्रह गरिएको बताए । ई–रिक्सालाई उपमहानगरमा दर्ता गराउन मजदुर संगठनले सार्थक पहल गरेको थियो । 

कँडेलले उपमहानगरपालिकाको निर्णण र विधिविपरीत सञ्चालनमा आएका ई–रिक्साका कारण दुर्घटना बढ्दै जाने र ट्राफिक व्यवस्थापमा समेत बाधा पर्ने हुँदा त्यस्ता रिक्सालाई कारवाही गर्ने प्रक्रिया अगाडि बढाउन आग्रह गरिएको बताए ।  

बुटवल उपमहानगरपालिकाले जारी गरेको सूचना र त्यसको अवधिमा कागजातसहित आवेदन दर्ता गराएका एक हजार १८ वटा विद्युतीय ई–रिक्साहरूको ब्लुबुक तयार पार्ने र इजाजतका लागि अरू नियामक निकायमा सिफारिस गरिएको छ । 

उपमहानगरमा दर्ता भएका, ब्लुबुक तयार भएका १ हजार १८ वटा मात्रै ई–रिक्सा चल्न पाउने छन् । १ हजार ८ सय भन्दा बढी अटो रिक्सा सञ्चालनमा रहेको अनुमान छ । 

ज्ञापनपत्र बुझदै एसपी थापाले उपमहानगरपालिकाले नियमनमा नआएका रिक्सालाई कारवाहीको लागि पत्राचार गरे आफूहरू निश्चित समय तय गरी कारवाही गर्न तयार रहेको बताए ।  

नेपाल यातायात स्वतन्त्र मजदुर संगठनका केन्द्रीय सदस्य ठाकुर गैरेले आफूहरूको पहलको सुनुवाइ नभए संगठन बाध्य भएर आन्दोलनमा जानुपर्ने अवस्था आउने बताए । २०७२ मा भएको नाकाबन्दीको समयमा बुटवलमा अटो रिक्सा भित्रिएका थिए ।