निजामती स्मारकमा पूर्वप्रधानमन्त्री आचार्य र पूर्व मुख्यसचिव थापाको शालिक

गोकर्णेश्वर नगरपालिका–४ स्थित यज्ञडोल (जगडोल) सामुदायिक वनमा निर्माणाधीन निजामती स्मारकमा पूर्वप्रधानमन्त्री टङ्कप्रसाद आचार्य र मुख्यसचिव चन्द्रबहादुर थापाको शालिक निर्माण गरिने भएको छ ।

विसं २०१३ भदौ २२ गते निजामती ऐन ल्याउन महत्वपूर्ण भूमिका निर्वाह गर्नुभएका पूर्वप्रधानमन्त्री आचार्य र मुख्यसचिव थापाको शालिक शिलान्यास गर्न लागिएको राष्ट्रिय सहिद तथा शान्ति पार्क, निजामती (स्मारक) यज्ञडोल (जगडोल) सामुदायिक वन पर्यापर्यटन प्रवद्र्धन तथा उद्यान व्यवस्थापन समितिका अध्यक्ष सुदर्शन सिग्देलले जानकारी दिए।  

यही भदौ २२ गते निजामती दिवसका अवसरमा मुख्यसचिव शङ्करदास बैरागीले स्मारक निर्माणस्थलमा शालिकको शिलान्यास गर्नुहुने कार्यक्रम रहेको उनले जानकारी दिए। विसं २०६८ देखि निर्माण सुरु भएको स्मारकको काम अझै सकिएको छैन । गोकर्णमा राष्ट्रिय सहिद स्मारकसँगै निजामती स्मारक निर्माण भइरहेको छ । असी प्रतिशत भौतिक प्रगति भएर काम अलपत्र भएको समितिका अध्यक्ष सिग्देलले जानकारी दिए।

शान्ति तथा पुनःनिर्माण मन्त्रालयअन्तर्गत निर्माण शुरू भएको आयोजना मन्त्रालय खारेजीसँगै हाल सहरी विकास मन्त्रालयमार्फत सञ्चालनमा छ ।

सहरी विकास तथा भवन निर्माण विभागले जिम्मा लिएको चार वर्ष पूरा भए पनि काममा प्रगति हुनसकेको छैन । डाँफे–गौरी–पर्वत–सुनौला–खिम्ती जेभीले स्मारक निर्माण ठेक्का पाएको छ । पछिल्लो समय विभागले पनि ध्यान नदिँदा काममा ढिलाइ भएको स्थानीयवासीको गुनासो छ ।