माधव नेपालले भने- बागमती र प्रदेश १ मा एक साताभित्रै सरकार

नेपाल कम्युनिष्ट पार्टी (एकीकृत समाजवादी) का अध्यक्ष माधवकुमार नेपालले एक हप्ताभित्र प्रदेश १ र बागमती प्रदेशमा आफ्नो पार्टी नेतृत्वको सरकार बनाउने उद्घोष गरेका छन् ।

पोखरामा आइतवार आयोजित कार्यकर्ता प्रशिक्षण कार्यक्रमलाई सम्बोधन गर्दै अध्यक्ष नेपालले भने, ‘प्रदेश १ र बागमतीमा हामी एक हप्ताभित्र केपी ओली नेतृत्वको सरकार हटाएर हामी सरकारमा जानेछौं ।’ उनले आफ्नो पार्टी सातै प्रदेशमा बलियो भएको पनि जिकिर गरे । 

‘सुदूरपश्चिम प्रदेशमा सातवटै पार्टीभन्दा हामी एक नम्बर छौं । २ नम्बर प्रदेशमा केपी ओलीको पार्टीलाई पछाडि धकेलेर हामी एक नम्बरमा उभिएका छौं । कर्णाली प्रदेशमा हामीले टक्कर दिएर धुलो चटाएका छौं,’ उनले भने, ‘जहाँसम्म लुम्बिनीमा पनि सरकारमा गइरहेका छौं । यो गण्डकी प्रदेशमा हामी भेदभाव गरियो, टिकटबाट वञ्चित गरियो । देशभरका पीडितहरू एकताबद्ध भएका छौं ।’

मन्त्रिपरिषद् विस्तारमा ढिलाइ भइरहेका बेला उनले एक हप्ताभित्र आफ्नो पार्टीको तर्फबाट मन्त्रीहरू पठाउने जानकारी पनि दिए । पाँच दलीय गठबन्धनलाई आउँदो चुनावसम्म बलियो बनाउँदै लैजाने बताउँदै उनले भने, ‘यही हप्ताभित्र हामी केन्द्रीय सरकारमा पनि मन्त्रीहरू पठाउन गइरहेका छौं ।’

उनले अन्तिम अवस्थामा आफूलाई छाडेर हिँडेकाहरूमाथि टिप्पणी नगरे पनि भएका कार्यकर्तालाई एमाले नफर्कन आग्रह गरे । 

‘कमरेडहरू हिजोको कुरा सम्झेर हुँदैन । त्यहाँ त जम्मै ढोका बन्द भइसक्यो, त्यहाँ त फाँसीको सजाय दिइएको हुनाले महाराजाधिराजले आममाफी पनि दिइसके । भोलिपल्ट फेरि सजाय दिए, फेरि मृत्युदण्डको सजाय दिएका छन्,’ उनले भने, ‘त्यहाँ फर्केर जाने कुरा नसोच्नुहोस् । यो पार्टीलाई अगाडि बढाऊँ ।’ 

अध्यक्ष नेपालले यसपटक सरकार एवं नियुक्तिमा भाग लिने र योग्य कार्यकर्तालाई अवसर दिने उद्घोष पनि गरे । ‘कसैले केही प्रचार गरोस्, अनेक नियुक्ति छन् । ती नियुक्तिमा जसरी आसेपासेलाई पठाइएको थियो, योग्यता क्षमता नभएकालाई पनि पठाइएको थियो, अनुचित काम गर्नेहरूलाई पनि पठाइएको थियो, स्यालहुइँया गर्नेलाई पठाइएको थियो, जथाभावी गर्नेलाई पठाइएको थियो,’ उनले भने, ‘तीबाट मुक्त भएर हामीले त्यसमा पनि समुचित ढंगले व्यवस्थापन गर्न गइरहेका छौं ।’