परराष्ट्रमन्त्री नारायण खड्काले अमेरिकी सहयोगको एमसीसी सम्झौता नेकपा माओवादी केन्द्र सहितको नेपाली कांग्रेस नेतृत्वको सरकारले गरेको बताएका छन् ।

अमेरिका भ्रमणमा रहेका मन्त्री खड्काले एक कार्यक्रममा माओवादी सहितको मन्त्रिपरिषद् बैठकले पारित गरेर एमसीसी सम्झौता भएको बताए ।

‘जुन बेला अर्थमन्त्रीलाई (अमेरिका) पठाइयो सही गर्नका लागि, त्यतिबेला नेपाली कांग्रेस एक्लै थिएन, त्यतिखेर माओवादी केन्द्रसँग सहकार्य गरेर निर्वाचनका लागि सरकार बनाएका थियौं । अर्थमन्त्रीलाई पठाउनका लागि प्रधानमन्त्री एक्लैले पठाउने होइन, त्यहाँ क्याबिनेटमा जान्छ र क्याबिनेटले ओके भनिसकेपछि अर्थमन्त्रीले आएर सही गर्नुभयो,’ उनले भने, ‘मन्त्रिपरिषद्मा अर्थमन्त्रीको प्रस्ताव लैजाँदा ती दलका साथीहरू पनि हुनुहुन्थ्यो, त्यतिखेरै त्यसलाई रोक्नुपर्थ्यो, के गर्नुपर्थ्यो ।’

एमसीसीको प्रक्रिया डा. बाबुराम भट्टराई प्रधानमन्त्री हुँदा शुरू भएर पुष्पकमल दाहाल ‘प्रचण्ड’, केपी शर्मा ओली सबैलाई जानकारी रहेको मन्त्री खड्काले बताए ।

एमसीसी पारित गर्न तत्कालीन प्रधानमन्त्री ओलीले बजेटमै राखेर एमसीसी पारित गर्न प्रयास गरेका उनले स्मरण गरे । 

उनले भने, ‘हिजो पास गर्नुपर्छ भन्ने पार्टी र त्यसका नेता, बजेटमा समेत राखियो, अगाडि बढाउन पहल पनि गरियो, त्यो बेला संशोधन हुनुपर्छ भन्ने थिएन । अहिले आएर संशोधन हुनुपर्छ भन्ने कुरा आयो । हामी कहाँ छौं, हामी राष्ट्रिय नेता भएको मान्छे के बोल्छौं ? कति जवाफदेही छौं ? अनि के भन्छ दुनियाँले ?’

मन्त्री खड्काले एमसीसी सम्झौता संशोधन नहुने बताए ।