सर्वोच्चमा न्यायाधीशहरूको विद्रोह, एक्लिए प्रधानन्यायाधीश जबरा

न्यायिक आचरणविपरीत काम गरेका प्रधानन्यायाधीश चोलेन्द्रशमशेर जबराविरुद्ध सर्वोच्च अदालतमा न्यायाधीशहरूको विद्रोह भएको छ । विगतमा उनी निकट भनेर चिनिएका न्यायाधीशहरूले समेत आइतवारदेखि उनको साथ छाडेका छन् । 

आइतवार सर्वोच्च अदालतका १४ न्यायाधीशको बैठक बसेर प्रधानन्यायाधीशले बोलाएको भोलिको बैठकमा सहभागी नहुने निर्णय गरेका छन् । 

आइतवार न्यायाधीशहरूको बैठकमा १४ जना उपस्थित थिए भने ४ जना काठमाडौं बाहिर र एकजना विदेशमा छन् । 

बैठकमा न्यायाधीशहरू दीपक कार्की, मीरा खड्का, हरिकृष्ण कार्की, विश्वम्भर श्रेष्ठ, प्रकाशमानसिंह राउत, आनन्द मोहन भट्टराई र सुष्मालता माथेमा सहभागी थिए ।

यसैगरी न्यायाधीशहरू प्रकाश ढुंगाना, कुमार रेग्मी, हरि फुँयाल, बमकुमार श्रेष्ठ, टंक मोक्तान, मनोज शर्मा र नहकुल सुवेदी पनि आजको बैठकमा सहभागी भएका थिए ।।

आजको बैठकमा अनुपस्थित रहेका न्यायाधीश सपना प्रधान मल्ल, अनिल सिन्हा, तेजबहादुर केसी र कुमार चुडालको पनि आफूहरूको अभियानमा समर्थन रहने आजको बैठकमा सहभागी एक न्यायाधीशले लोकान्तरसँग भने । न्यायाधीश ईश्वर खतिवडा देशबाहिर छन् । 

‘न्यायालयको गरिमा बचाउन आज सर्वोच्चका न्यायाधीशहरूको अभूतपूर्व एकता देखियो, भोलि सर्वोच्च अदालतको विवाद क्लाइमेक्समा पुग्छ,’ ती न्यायाधीशले लोकान्तरसँग भने । 

भोलि बिहान ११ बजे फेरि बैठक बसेर न्यायाधीशहरूले थप निर्णय गर्ने बताएका छन् । 

१४ न्यायाधीशले चोलेन्द्रशमशेर जबराको राजीनामा अब न्यूनतम शर्त भएको निष्कर्ष निकालेका थिए । मन्त्रिपरिषद्मा भागबण्डा खोजेको भन्दै प्रधानन्यायाधीश जबराको चौतर्फी आलोचना भएको छ । 

शुक्रवार मात्र पूर्वन्यायाधीश फोरमले न्यायालयको स्वतन्त्रताको लागि जबराले न्यायालय छाड्नु पर्ने धारणा सार्वजनिक गरेको थियो । मन्त्रिपरिषद्मा भागबण्डा खोजेपछि प्रधानन्यायाधीश विवादमा फसेका थिए ।