पाकिस्तानमा तीन दिनदेखि अत्यधिक गर्मीः कराँचीमा २५ जनाको ज्यान गयो

इस्लामाबाद–पाकिस्तानको दक्षिणी बन्दरगाह शहर कराँचीमा विगत तीन दिनदेखि अत्यधिक रूपमा तापक्रम बृद्धि भएपछि कम्तीमा २५ जनाको ज्यान गएको छ । साथै, हजारौँलाई अस्पतालमा भर्ना गरिएको स्थानीय सञ्चारमाध्यमले मङ्गलबार जनाएका छन् ।

उच्च तापक्रमका कारण धेरै बिरामीहरूमा पानीको मात्रा कम भएको र प्राथमिक उपचारपछि डिस्चार्ज गरिएको चिकित्सकहरूले बताएका छन् । यद्यपि, मुटुको रोग र क्यान्सरजस्ता दीर्घरोग भएका केही व्यक्तिलाई थप उपचारका लागि अस्पतालमा राखिएको उद्धारमा संग्लग्नहरूले बताएका छन् ।

पाकिस्तानको मौसम विज्ञान विभागका अनुसार मुख्यतया शहरी क्षेत्रमा समुद्री हावाको अवरोधका कारण विगत तीन दिनदेखि अधिकतम तापक्रम ४० डिग्री सेल्सियस नाघेको बताएको छ ।

मौसम विभागले बुधबार साँझ कराँचीमा समुद्री हावा फेरि शुरू हुने जसले गर्दा तापक्रममा क्रमिक गिरावट आउन सक्ने पूर्वानुमान गरेको छ ।