चिनियाँ सेनाले ताइवानको सीमानजिक पछिल्लो २४ घन्टामा २० वटा लडाकू विमान पठाएको छ । 

ताइवानको रक्षा मन्त्रालयले जनाएअनुसार, चीनका लडाकू विमानहरू ताइवानको एयर डिफेन्स आइडेन्टिफिकेसन जोन नजिक पुगे । शनिवार साँझ चीनले जे–१६ र छङ्तु जे–१० विमान पठायो ।

चिनियाँ वायुसेनाका विमानहरू हवाई रक्षा सीमा नजिक दक्षिणपश्चिम इलाकामा पसेका थिए । यो ताइवानको प्रतास टापुको पूर्वोत्तरमा पर्छ । 

ताइवानले चिनियाँ विमानलाई इन्टरसेप्ट गर्न फाइटर जेट पठायो र रेडियोमा चेतावनी दियो । त्यसपछि ताइवानले एन्टी एयरक्राफ्ट मिसाइल पनि चिनियाँ विमानको ट्य्राकिङका लागि तैनाथ गरेको थियो । 

ताइवानविरुद्ध सम्भावित आक्रमणको तयारीका रूपमा चिनियाँ सेनाले हतियार र ट्यांक समेत तैनाथ गरेको थियो । 

ताइवान नजिक चिनियाँ सैन्य गतिविधि बढेपछि विश्वको चिन्ता बढेको छ । ताइवानले स्वतन्त्रता खोजेमा युद्ध अवश्यम्भावी रहेको चीनको भनाइ छ ।