तीन दिन कालोपट्टी बाँधेर देशभर विरोध प्रदर्शन गर्ने बार एसोसिएसनको निर्णय

नेपाल बार एसोसिएसनले देशभर विरोध प्रदर्शन गर्ने निर्णय गरेको छ । बार एसोसिएसनकी उपाध्यक्ष रक्षा बस्यालले बार पदाधिकारीको सोमबार बसेको बैठकले कात्तिक २८, २९ र ३० गते तीन दिन कालोपट्टि बाँधेर विरोध प्रदर्शन गर्ने निर्णय भएको जानकारी दिइन् ।

यस्तै कार्तिक २३ देखि ३० गते सम्म उपत्यका भित्रका सबै अदालतमा बिहान १० देखि मध्यान्ह १२ बजेसम्म इजलास बहिस्कार गर्ने निर्णय भएको छ भने प्रधानन्यायाधीशको राजीनामाको माग यथावत रहेको छ । बैठकले प्रधानन्यायाधीशले बोलाएको न्याय परिषद् सहित न्याय सेवा आयोग लगायतको कुनै पनि बैठकमा उपस्थित नहुने निर्णय पनि गरेको बस्यालले जानकारी दिइन् ।

न्यायालय सुधार तथा प्रधानन्यायाधीशकाे राजीनामाको माग गर्दै बारले चरणबद्ध आन्दोलन गर्दै आएको छ ।

महाभियोग लगाउन ज्ञापनपत्र बुझाउने
यसैबीच नेपाल बार एसोसिएसनले कुनैपनि हालतमा प्रधानन्यायाधीशले राजीनामा दिनुपर्ने निष्कर्ष निकालेको छ । जसका लागि बारले प्रधानमन्त्री तथा संसदमा रहेका दलहरूलाई ज्ञापनपत्र दिएर ध्यानाकर्षण गराउने भएको छ ।प्रधानन्यायाधीशको राजीनामा नआएसम्म विरोधको कार्यक्रमहरू जारी राख्ने निर्णय गरेको उपाध्यक्ष बस्यालले जानकारी दिइन् ।