बेलका नगरपालिकालाई माछामा आत्मनिर्भर बनाउने उद्देश्यले उदयपुरको बेलका नगरपालिका–२ स्थित रामनगरमा व्यावसायिक माछापालन शुरू गरिएको छ । 

बेलका माछा सहकारी संस्था दर्ता गरेर नगरपालिकाको साझेदारीमा व्यावसायिकरूपले माछा पालन गर्न थालिएको हो ।

कोशी नदीको किनारमा खाली रहेको १४६ बिघा  जमिन नगरपालिकासँग भाडामा लिएर गत वैशाखदेखि माछापालन शुरू गरिएको संस्थाका अध्यक्ष अशोक कार्कीले जानकारी दिए ।

हाल ३३ वटा पोखरी बनाई ३ लाख २८ हजार माछाका भुरा छाडिएको उनले बताए । अहिले २ किलोग्रामसम्मका माछा भइसकेका र बिक्री गर्न पनि थालिएको छ ।

प्रदेश सरकारको ४५ लाख रुपैयाँ र सहकारीको ५५ लाख रुपैयाँको लगानीमा फार्म शुरू गरिएको छ । उदयपुरमा माछा जोनको कार्यक्रम परेकाले यसअघिदेखि व्यावसायिक रूपले माछापालन गर्दै आएका कार्कीको सक्रियतामा बेलका नगरमा माछा फार्म खोलिएको सहकारी संस्थाका सदस्य शरद कोइरालाले बताए ।