नेपाली कांग्रेसको १४ औं महाधिवेशनमा उपसभापतिका उम्मेदवार बनेका डा. चन्द्र भण्डारीले महाधिवेशनमा सभापतिका उम्मेदवार शेरबहादुर देउवाले पैसा र सरकारको शक्ति प्रयोग गरेको आरोप लगाएका छन् । 

महाधिवेशनमा सभापतिका उम्मेदवार शेखर कोइराला समूहले आयोजना गरेको धन्यवाद ज्ञापन सभालाई सम्बोधन गर्दै भण्डारीले भने, ‘शक्तिको लागि पद र पद प्राप्त गर्न रंगमञ्चमा पैसाले ठूलो काम गर्दो रहेछ । यो सरकार हुँदैनथ्यो, सरकारको दुरूपयोग हुँदैनथ्यो, मनी, मसलको प्रयोग हुँदैनथ्यो भने हामीले जितिसकेका हुने थियौँ ।’ 

भण्डारीले नयाँ प्रविधिसहित जानेको नयाँ डाक्टर र पुरानो गरी दुई डाक्टरको उदाहरण दिँदै भने, ‘बिरामी नयाँ डाक्टरकोमा जानै मान्दैन । पुरानो डाक्टरको हात काँप्छ अप्रेशन गर्दा प्यारालाइसिस हुने डर छ । तर, बिरामी उतै जान चाहन्छ । मेरो पार्टीभित्रको बिरामी साथीहरू बोली नबुझिए पनि उतै जान्छन् । अब मेरो क्लिनिक भने १५ औं महाधिवेशनसम्म चलाइराख्न आवश्यक भयो ।’ 

सम्बोधनको क्रममा भण्डारीले अर्कोे पनि उदाहारण जोडे । ‘मोबाइलले अहिले टाइपराइटर, टीभी, रेडियो सबैको ठाउँ लिएको छ । तत्काल लाइभ गर्न पनि सकिन्छ । टाढाटाढा छोराछोरीहरूसँग कुरा गर्न पनि सकिन्छ । पार्टीमा पनि नयाँ सेट बनाऔं भनेका थियौं । हाम्रा साथीहरूले अधिवेशनमा स्वीकार गर्न सक्नुभएन,’ भण्डारीले भने । 

पार्टीमा आदर्श मानिएका व्यक्तिहरू पनि सत्ता र शक्तिका निम्ति ढलेको उनले बताए । भण्डारीले भने, ‘सत्ता र शक्तिका निम्ति कति ठूलो परिवारका खम्बाहरू ढल्दा रहेछन् हात हल्लाएको देख्नुभएकै छ । तर, पन्ध्रौँ अधिवेशनको नेतृत्व गर्ने जिल यही हलभित्र छ । यो हलले विचारको नेतृत्व गरेको छ र विचारले जितेको छ । निष्ठावान कांग्रेसले जितेको छ ।’

आगामी दिनमा शेखर कोइराला समूहको बाटो नरोकिने उनले बताए । ‘हाम्रो बाटो अब रोकिँदैन । हाम्रा पैतलाहरू पछाडि फर्किँदैन । हाम्रा दृष्टिकोण पछाडि फर्किँदैनन्,’ भण्डारीले भने, ‘हामीले मानेका आदरसम्मान गरेका मान्छेहरूलाई पनि तपाईं हामीले चिन्ने मौका पायौं ।’ 

सभापति जितेका शेरबहादुर देउवाले गुटको नेतृत्व नगरी सिंगै पार्टीको नेतृत्व गर्न भण्डारीले सुझाव दिए ।