अमेरिकी सहयोग परियोजना मिलेनियम च्यालेन्ज कम्प्याक्ट (एमसीसी)का विषयमा सत्ता गठबन्धन दलबीच विवाद भएको छ । संसद अवरोध खुलाउन र एमसीसीबारे साझा धारणा बनाउन बालुवाटारमा बसेको सर्वदलीय बैठकमा गठबन्धन दलबीच नै विवाद भएको हो । 

सत्ता गठबन्धनका दलहरूले यथास्थितिमा एमसीसी पास गर्न नमिल्ने बताए । कांग्रेसले भने संसद अवरोधका बीच भए पनि एमसीसी पास गर्नुपर्ने जनाएको थियो । 

नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ र नेता नारायणकाजी श्रेष्ठले संशोधनविना एमसीसी पास गर्न नहुने धारणा राखेका थिए । कांग्रेस नेता ज्ञानेन्द्र कार्कीले एमसीसी अगाडि बढाउनुपर्ने जस्तो संकेत गरेपछि माओवादी नेता श्रेष्ठले यथास्थितिमा कुनै पनि हालतमा एमसीसी बढाउन नहुने बताएका थिए । 

त्यस्तै नेकपा (एस)का नेता वेदुराम भुसालले पनि संशोधनविना एमसीसी पास गर्न नहुने बताए । 

नेपाल मजदुर किसान पार्टीका नेता प्रेम सुवालले एमसीसी खारेज हुनुपर्ने बताए । उनका अनुसार त्यहाँ उपस्थित भएका राष्ट्रिय जनमोर्चा, राप्रपालगायतका दलले पनि एमसीसीको विरोध गरेका थिए । 

बैठकमा कांग्रेसका तर्फबाट रामचन्द्र पौडेल, रामशरण महत, ज्ञानेन्द्रबहादुर कार्कीले एमसीसीको समर्थन गर्दै यसलाई अगाडि बढाउनुपर्ने बताएका थिए ।

जनता समाजवादी पाटीका संघीय परिषद् अध्यक्ष बाबुराम भट्टराईले एमसीसीलाई अगाडि बढाउनुपर्ने बताए । जसपा अध्यक्ष उपेन्द्र यादवले भने धारणा राखेनन् । 

यस्तै कांग्रेस नेता ज्ञानेन्द्रबहादुर कार्कीले बैठकबारे जानकारी दिँदै एमसीसीका बारेमा थप छलफल गर्ने सहमति भएको बताए । ‘बैठकमा संसद् अवरोध र एमसीसीबारे छलफल भयो,’ उनले भने, ‘एमसीसीका विषयमा थप छलफल गरेर निष्कर्षमा पुग्ने सहमति भएको छ ।’

लामो समयमसम्म संसदलाई बन्धक बनाइरहनु उचित नभएको भन्दै प्रमुख प्रतिपक्ष दलसँग संवाद र उपयुक्त सहमति खोज्ने बैठकले निष्कर्ष निकालेको उनको भनाइ छ ।