कामना सेवा फुटसल कप प्रतियोगिताको नकआउट समीकरण पूरा भएको छ । 

शुक्रवार भएको समूह चरणको खेलबाट नकआउट चरण पुग्ने १६ टोलीको टुंगो लागेको हो ।

प्रतियोगितामा सहभागी २४ टिमलाई ६ समूहमा विभाजन गरेर प्रतिस्पर्धा गराइएको थियो । समूह 'ए' बाट कुमारी बैंक समूह विजेता र सांग्रिला विकास बैंक उपविजेता बन्दै प्री–क्वार्टर फाइनल प्रवेश गरे ।

समूह बी बाट नेपाल राष्ट्र बैंक समूह विजेता र मुक्तिनाथ विकास बैंक उपविजेता बने ।

समूह सी बाट नेपाल इन्भेस्टमेन्ट बैंक विजेता र हिमालयन बैंक उपविजेता बने ।

समूह डी बाट ज्योति विकास बैंक विजेता र रिलायन्स फाइनान्स उपविजेता बने ।

समूह ई बाट मेगा बैंक विजेता र प्रिमियर इन्स्योरेन्स उपविजेता तथा समूह एफ बाट सिद्धार्थ बैंक विजेता र कामना सेवा विकास बैंक नीलो उपविजेता बने ।

उत्कृष्ट तेस्रो स्थानमा रहँदै सिटिजन्स बैंक इन्टरनेसनल, गरिमा विकास बैंक, महालक्ष्मी विकास बैंक र कामना सेवा विकास बैंक हरियोले समेत नकआउट चरणमा स्थान बनाए ।

समूह चरणमा अन्तिम टिमको टुंगो टसबाट गरिएको थियो । आयोजकको हरियो टिम र साइन रेसुङ्गा बैंकको टिमबीच अंक (समान ३ अंक), गोल अन्तर (समान –२ अंक) र कार्ड समेतमा बराबर भएपछि टसका आधारमा अन्तिम टिमको टुंगो लगाइएको थियो ।  

प्रतियोगिताको नकआउट चरणका खेल शनिवार सम्पन्न हुनेछन् ।

पहिलो प्री–क्वार्टरफाइनलमा कुमारी बैंक र हिमालयन शेर्पा तथा एनआईबीएल र सांग्रिला बैंकबीच प्रतिस्पर्धा हुनेछ । यस्तै, नेपाल राष्ट्र बैंकले रिलायन्स फाइनान्ससँग, मेगा बैंकले कामना सेवाको नीलो टीमसँग, सिटिजन्स बैंकले माछापुच्छ्रे बैंकसँग, ज्योति विकासले मुक्तिनाथसँग, सिद्धार्थले प्रिमियर इन्स्योरेन्ससँग र गरिमा विकास बैंकले कामना सेवाको हरियो टीमसँग प्रतिस्पर्धा गर्नेछन् ।

कामना सेवा विकास बैंक र खेलपाटीको सहकार्यमा बैंक, वित्तिय सस्था तथा इन्स्योरेन्स कम्पनीलाई समावेश गर्दै प्रतियोगिता आयोजना भएको हो । 

प्रतियोगिताको विजेताले ट्रफी, मेडलसहित उत्कृष्ट गिफ्ट ह्याम्पर प्राप्त गर्नेछन् ।