माओवादी महाधिवेशन- बुधवार समूहगत छलफलको निष्कर्ष प्रस्तुत हुने, टोली नेतालाई १५ मिनेटको समय

नेकपा (माओवादी केन्द्र)को आठौं महाधिवेशनको बन्दसत्रअन्तर्गत बुधवारबाट समूहगत छलफलको निष्कर्ष प्रस्तुत हुने भएको छ । 

बुधवार दिउँसो १ बजेबाट शुरू हुने समूहगत छलफलको निष्कर्ष प्रस्तुतिका लागि समूह प्रमुखलाई १५ मिनेटको समय दिइएको छ । 

समूहगत छलफलका लागि सोमवार २५ वटा समूह गठन गरिएको थियो ।

बन्द सत्रको पहिलो दिन सोमवार अध्यक्ष पुष्पकमल दाहाल ‘प्रचण्ड’ले प्रस्तुत गरेको ‘२१ औं शताब्दीको समाजवादको नेपाली बाटो’ शीर्षकको वैचारिक तथा राजनीतिक दस्तावेज र स्थायी कमिटी सदस्य देवप्रसाद गुरुङबाट प्रस्तुत विधान मस्यौदामा मंगलवार दिनभर समूहगत छलफल भएको थियो । 

अधिकांश समूहले वैचारिक तथा राजनीतिक दस्तावेज र विधान मस्यौदामाथिको छलफल सकाएका छन् । बाँकी समूहले बुधवार मध्यान्ह १२ बजेभित्र छलफल सक्ने महाधिवेशन प्रचारप्रसार उपसमितिले प्रेस नोट जारी गर्दै जानकारी दिएको छ । महाधिवेशन प्रज्ञा भवन, कमलादीमा भइरहेको छ ।