भौतिक पूर्वाधार तथा यातायात मन्त्री रेणुकुमारी यादवले मन्त्रालयको काममा खट्ने इन्जिनीयरको अभावको कारण विकास निर्माणको काम तीव्रता दिन नसकेको बताएकी छन् ।

सोमवार भएको प्रतिनिधिसभा अन्तर्गतको अर्थ समितिको बैठकमा बोल्दै मन्त्री यादवले मन्त्रालयमा काममा खट्ने इन्जिनीयरहरूको अभावको कारण विकास निर्माणको काम तीव्रगतिमा अगाडि बढ्न नसकेको बताइन् ।

मन्त्री यादवले पूर्वाधार निर्माणको काममा खट्ने इन्जिनीयहरूको अभाव भएको र भएका इन्जिनीयरहरू पनि पढाइ लगायत विभिन्न बिदा लिएर काठमाडौंमा बस्न थालेकाले अझ बढी समस्या भएको बताइन् ।

उनले यसरी विकास निर्माणको काममा खट्नुपर्ने इन्जिनीयहरू अत्यावश्यकबाहेक बिदामा नबसी तत्काल काम गर्न आग्रह समेत गरिन् ।

पढाइका लागि मन्त्रालय तथा मन्त्रालय मातहतका ८० भन्दा बढी इन्जिनीयरहरू बिदामा रहेका उनले बताइन् ।

मन्त्री यादवले भनिन्, ‘पछिल्लो समय मन्त्रालयमा कर्मचारी अभावको रहेको छ । कर्मचारी अभावको कारण विकास निर्माणका योजनाहरू अगाडि बढ्न सकेको छैन । योजनाहरू अगाडि बढ्न नसक्दा पुँजीगत खर्च बढ्न सकेको छैन । त्यस्तै पछिल्लो समय पूर्वाधार निर्माणका लागि फिल्डमा खटिनुपर्ने इन्जिनियरहरू बिदामा बसेका छन् । त्यसले पनि १० जनाले गर्ने काम १ जनाले गर्नुपर्ने परिस्थिति रहेको छ । यस्तो अवस्था रहेकाले अत्यावश्यकबाहेक बिदामा बस्ने कर्मचारीहरूलाई तत्काल काममा फर्किन आग्रह गर्दछु । अहिले यसरी बिदामा बस्ने मन्त्रालय र मातहत निकायका मात्रै ८० भन्दा बढी इन्जिनीयरहरू रहेका छन् । मन्त्रालयमा कर्मचारी अभाव भएको बेलामा पढाइ बिदा लिएर काठमाडौंमा बसिरहँदा निर्माणको काम बाधा पुग्ने गरेको छ । इन्जिनीयरहरूलाई काठमाडौंमा बसेर काम छैन । फिल्डमा जनशक्ति अभाव छ ।’