पोखरामा शुरू भएको २०औं आहा रारा गोल्डकपमा आयोजक सहारा क्लबलाई २–० ले हराउँदै विभागीय टीम एपीएफले विजयी यात्रा शुरू गरेको छ ।

दर्शक विना खेलाइएको खेलमा एपीएफको जीतका लागि आवास लामिछाने र प्रदीप लामाले समान १–१ गोल गरेका छन् ।

खेलको १३औं मिनेटमा एपीएफका आवास लामिछानेले पहिलो गोल गर्दै खेललाई अग्रता दिलाएका थिए । युरोपियन फूटबल खेलको अनुभव बटुलेका लामिछाने प्रतियोगिताको पहिलो गोलकर्ता पनि बनेका छन् ।

खेलको शुरूआतमै १ गोलले पछि परेको पहिलो हाफको सम्पूर्ण समय दबाबमा रहेका थियो । निर्धारित पहिलो हाफमा १–० ले अग्रता लिएको एपीएफले दोस्रो हाफको पनि शुरूआतमै दोस्रो गोल गर्दै अग्रतालाई दोब्बर बनाएको थियो ।

खेलको दोस्रो हाफ ५९औं मिनेटमा एपीएफका शनिष श्रेष्ठको लामो पासलाई कन्ट्रोल गर्दै प्रदीप लामाले बललाई दोस्रो गोलमा परिणत गरेका थिए । खेलमा आवास लामिछाने म्यान अफ दी म्याच घोषित भएका छन् ।

मोफसलकै चर्चित फूटबल प्रतियोगिताका रूपमा लिइएको आहा रारा गोल्डकपको यस वर्षको संस्करण दर्शक विना नै भइरहेको छ । कोरोना महामारीका कारण प्रशासनले भीडभाड गर्न रोकेकाले दर्शक विनै प्रतियोगिता आयोजना गरिएको हो ।

प्रतियोगिताको दोस्रो खेल शुक्रवार हिमालयन शेर्पा क्लब र नेपाल पुलिस क्लबबीच हुनेछ । १० वटा टीम सहभागी प्रतियोगिताको विजेताले १० लाख र उपविजेताले ५ लाख रुपैयाँ प्राप्त गर्नेछन् ।