अमेरिकाका राष्ट्रपति जो बाइडनले युक्रेनमाथि रुसको आक्रमण भएमा रुसका राष्ट्रपति भ्लादिमिर पुटिनमाथि व्यक्तिगत प्रतिबन्ध लगाउन सकिने बताएका छन् । 

युद्धको सम्भावना बढेपछि पश्चिमका नेताहरूले सैन्य तयारी तीव्र बनाएका छन् र युरोपलाई सम्भावित ऊर्जा आपूर्तिको समस्याबाट जोगाउन योजना निर्माण गरेका छन् ।

अमेरिका र रुसबीच युक्रेनका विषयमा भएको वार्ता निष्कर्षविहीन भएपछि बाइडनले मंगलवार पुटिनविरुद्ध चर्को कुरा गरेका हुन् । 

यसअघि अमेरिकाले भेनेजुएलाका निकोलास मदुरो, सिरियाका बशर अल असद र लिबियाका मुअम्मार गद्दाफीलाई व्यक्तिगत प्रतिबन्ध लगाइसकेको छ । 

पत्रकारहरूसँग कुरा गर्दै बाइडनले पुटिनमाथिको प्रतिबन्धका विषयमा विचार गर्ने बताएका हुन् । 

बाइडनले प्रतिबन्धको चेतावनी दिँदै गर्दा नेटोले पूर्वी युरोपमा सुरक्षाबलहरू तयारी अवस्थामा राखेको छ । उसले जहाज र लडाकू विमानहरूको संख्या पनि बढाएको छ । 

रुसले चाहिँ युक्रेनमा आक्रमण गर्ने आफ्नो कुनै योजना नरहेको जनाएको छ । अमेरिका र नेटोको गतिविधिका कारण तनाव चर्किएको धारणा उसले राखेको छ ।