अमेरिका र नेटोसमक्ष गत डिसेम्बर महिनामा रुसको परराष्ट्र मन्त्रालयले पठाएको दुईवटा सुरक्षा प्रस्तावमा जवाफ आएको रुसको परराष्ट्र मन्त्रालयले बुधवार जानकारी दिएको छ । 

उक्त प्रस्तावमा रुसले नेटोलाई पूर्वतर्फ थप विस्तार नगर्न आग्रह गरेको छ । अनि रुसका सीमा नजिक सेना, क्षेप्यास्त्र, जहाज र विमानको तैनाथीको सीमा तोक्न पनि भनेको छ । 

जवाफ लिखितमा प्राप्त नगरेको रुसका परराष्ट्र राज्यमन्त्री अलेक्जेन्डर ग्रुश्कोले बताए । 

‘हामी प्रतीक्षामा छौं । उनीहरूले यस साताको अन्त्यसम्ममा लिखित जवाफ पठाउने प्रतिज्ञा गरेका छन्,’ ग्रुश्कोले रुसी सञ्चारमाध्यमलाई बुधवार बताए । 

‘उनीहरूको उत्तर पाएपछि अर्को चरण शुरू हुनेछ,’ उनले थपे । 

सुरक्षा प्रत्याभूतिको प्रस्ताव तर्कसंगत भएको ग्रुश्कोले बताए । युरोप र विश्वमा सैन्य परिस्थितिको विकास खतरनाक विन्दुमा पुगेको उनको भनाइ छ । 

सुरक्षा प्रत्याभूति पहलमा उल्लेख गरिएको प्रस्तावले शान्तिलाई सम्भव बनाउने र यसका समर्थकहरूको संख्या बढ्नेमा रुस विश्वस्त रहेको पनि उनले बताए । 

युक्रेनका विषयमा पश्चिमी मुलुकहरूले रुसमाथि नयाँ प्रतिबन्ध लगाउने कुरामाथि टिप्पणी गर्दै ग्रुश्कोले यस्ता धम्कीको वास्तविक राजनीतिसँग लिनुदिनु नभएको बताए ।