नेपाली कांग्रेसका युवा नेता तथा केन्द्रीय सदस्य प्रदीप पौडेलले कांग्रेसले गठबन्धनको सरकार धेरै समय चलाउन नचाहेको बताएका छन् । 

शहीद दिवसको अवसरमा रूपन्देहीको भैरहवामा आइतवार आयोजित कार्यक्रमलाई सम्बोधन गर्दै उनले कांग्रेस एक्लै निर्वाचन जितेर स्थायी सरकार चलाउन चाहेको बताएका हुन् । 

उनले गठबन्धन सरकारले देशलाई ठूलो कुरा दिन नसक्ने दाबी समेत गरे । निर्वाचन हुँदा कांग्रेसलाई नै फाइदा हुने पौडेलको भनाइ छ । 

‘हामीले निर्वाचन जित्दैछौँ, हाम्रो स्थिति राम्रो बनेको छ, हामी नै निर्वाचन गर्नबाट किन भाग्ने ?,’ उनले भने, ‘जित्ने बित्तिकै शुरू गरेको योजना ५ वर्ष नबित्दै पूरा गर्न चाहन्छौं । केपी ओली जस्तो दुई तिहाइ ल्याएर देशको नेतृत्व गरेर सुतेर बस्ने काम कांग्रेसले गर्दैन ।’ 

नेता पौडेलले तीन वर्षसम्म दुई तिहाइको सरकार चलाएका ओलीले देशलाई केही दिन नसकेको आरोप लगाए । ओली नेतृत्वको सरकारले एउटा पनि नयाँ काम ल्याउन नसकेको उनको भनाइ थियो । 

‘पुराना सरकारबाट विरासतमा प्राप्त भएका कुरा रेडियो, टेलिभिजनको माध्यमबाट ओलीको सम्बोधनको नाममा प्रचार गर्दै सरकारले उपलब्धि गर्‍यो भनेर कसैले पत्याउँदैन,’ उनले भने ।