मन्त्रीलाई यौनकाण्डमा फसाउन यत्रो षड्यन्त्र ! मोडल उपाध्यायको आत्महत्यापछि खुलासा

शारीरिक सम्पर्क र जबरजस्ती यौनजन्य क्रियाकलाप आपराधिक कार्यमा पर्छन् । तर बहालवाला मन्त्रीलाई नै फसाउन यौनकाण्ड रच्न खोजिएको खुलासा भएको छ ।

भारतको राजस्थानमा १९ वर्षीया मोडल गुनगुन उपाध्यायले होटलको छतबाट हामफालेर आत्महत्या गरेपछि मन्त्रीलाई यौनकाण्डमा फसाउन खोजेको खुलासा भएको छ ।

उपाध्यायको आत्महत्यापछि छानबिन गरेको प्रहरीले ‘हनी ट्रयाक’ गिरोहको खुलासा गरेको छ । प्रहरीका अनुसार गिरोहले राजस्व मन्त्री रामलाल जाटलाई यौनकाण्डमा फसाउन खोजेको थियो ।

जोधपुर प्रहरीका अनुसार गिरोहले उपाध्यायलाई जालमा पारेको थियो । गिरोहको नेतृत्वकर्ता सुभासनगरका अक्षत शर्मा रहेका प्रहरीले जनाएको छ ।

प्रहरीले अक्षतसहित गिरोहका सदस्य उदयपुरकी दीपालीलाई समेत पक्राउ गरिसकेको छ । अक्षत र दीपाली मोडलिङ गर्ने युवतीलाई प्रयोग गरेर मन्त्री जाटलाई फसाउन चाहन्थे । यसका लागि दुवैले मिलेर उपाध्यायका अश्लील भिडियो बनाएर भाइरल गरिदिने धम्की दिइरहेका थिए ।

धम्की र षडयन्त्रको चपेटामा परेकी उपाध्यायले आइतवार होटलबाट हामफालेर आत्महत्या गरेकी छन् । प्रहरीले घटनाको थप अनुसन्धान गरिरहेको भारतीय सञ्चारमाध्यमले जनाएका छन् ।