ललितपुरको धापाखेलमा गाडिएको अवस्थामा एक शव भेटिएको छ ।

गोदावरी नगरपालिका १२ धापाखेलस्थित प्रकाश थापा मगरको घर नजिकै ५ फिट खाल्टोभित्र पुरेको अवस्थामा शव फेला परेको महानगरीय अपराध महाशाखाका एसएसपी वसन्त कुँवरले लोकान्तरलाई जानकारी दिए । 

उनका अनुसार, शब ५ फिट गहिरो खाल्डो खनेर सिमेन्ट तथा बालुवाले प्लास्टर गरेर पुरिएको थियो । 

बरामद शव तेह्रथुमका मोहन लिम्बुको भएको कुँवरले बताए । 

मोरङ प्रहरी र महानगरीय अपराध महाशाखाको संयुक्त टोलीले सूचनाको आधारमा सो स्थानमा अनुसन्धान गर्दा शव भेटिएको हो । 

मोरङस्थित उखुबारीमा भएको हत्यामा संलग्न रहेको आरोपमा पक्राउ परेका अनिल कुमार मण्डलको प्रारम्भिक बयानका आधारमा सो स्थानमा अनुसन्धान गर्दा शव भटिएको हो । 

१२ माघमा मोरङको धनपालथान गाउँपालिका–७, कमलपुरको बस्तीनजिक उखुबारीमा खाल्डोमा गाडिएको अवस्थामा दुई जनाको शव भेटिएको थियो । सो हत्या र धापाखेलमा भएको हत्याको 'कनेक्सन' हुन सक्ने प्रहरीले आशंका गरेको छ ।