नेपाली कांग्रेसको केन्द्रीय कार्यसम्पादन समितिको बैठकले गठबन्धन कायम नभए पनि एमसीसी पारित गर्नुपर्ने निष्कर्ष निकालेको छ । 

पार्टी सभापति शेरबहादुर देउवाले केन्द्रीय कार्यसम्पादन समितिको बिहीवारको बैठकमा एमसीसीबारे छलफल गराएका थिए ।

देउवाले एमसीसीबारे पार्टीमा छलफल नै नगराएको कांग्रेस नेताले आरोप लगाएपछि उनले कार्यसम्पादन समितिको बैठकमा छलफल गराएका हुन् ।

केन्द्रीय कार्यसम्पादन समितिको बैठकमा बोल्ने नेताहरूले गठबन्धन नरहे पनि एमसीसी पारित गर्नुपर्ने निष्कर्ष राखेको नेता शशांक कोइरालाले बताए । 

बैठकबाट बाहिरिने क्रममा उनले कांग्रेसका नेताहरूले एमसीसी पारित गर्नुपर्ने निष्कर्ष बैठकमा राखेको बताए ।

कांग्रेसका प्रवक्ता डा. प्रकाशशरण महतले एमसीसी संसदमा लैजानुपर्नेबारे बैठकमा छलफल भएको जानकारी दिए । ‘संसद नै सर्वोच्च निकाय हो, एमसीसीको बारेमा नियोजित प्रचार गरेर जनतामा भ्रम छरिएको विषय संसदमा छलफल हुन पायो भने यो विषय के रहेछ भन्ने थप स्पष्ट हुन्छ । एमसीसी संसदमा लैजान कि आपत्ति ?’ महतले भने । 

बैठकमा शेरबहादुर देउवाले सत्ता गठबन्धनमा एमसीसीबारे भइरहेको छलफल जानकारी गराएर डा. महतलाई एमसीसीबारे बोल्न समय दिएका थिए ।

महतले एमसीसीबारे आफ्नो भनाई राखेपछि बैठकले एमसीसी पारित गर्ने निष्कर्ष निकालेको छ । गठबन्धन नरहे पनि एमसीसी पारित गर्नुपर्ने बैठकको निष्कर्ष रहेको उनले जानकारी दिए । 

बैठकमा देउवाले एमसीसीमा भएका सकरात्मक–नकरात्मक विषयबारे जानकारी गराउन महतलाई आग्रह गरेका थिए । 

कांग्रेस केन्द्रीय कार्यसम्पादन समितिको बिहीवारको बैठकमा सबै नेताले बोल्न नभ्याएका कारण बैठक शुक्रवार पनि बस्ने महतले जानकारी दिए । 

कांग्रेसको केन्द्रीय कार्यसम्पादन समितिको पहिलो बैठक पार्टी कार्यालय सानेपामा बसेको थियो । बैठकमा स्थानीय तह निर्वाचनको तयारी, म्याद सकिएका भातृ संघसंस्था, एमसीसी लगायतका विषयमा छलफल भएको कांग्रेसका प्रवक्ता डा. प्रकाशशरण महतले बताए ।