वाणिज्य बैंकहरूले दुई अर्ब रूपैयाँ निक्षेप बढाउँदा कर्जा लगानी भने १० अर्ब रूपैयाँले बढाएका छन् । नेपाल बैंकर्स एशोसिएसनले सोमवार सार्वजनिक गरेको फागुन दोस्रो सातासम्मको तथ्यांकअनुसार वाणिज्य बैंकहरूले निक्षेपको तुलनामा अस्वभाविक कर्जा प्रवाह बढाएका हुन् ।

बैंकहरूले स्रोतको खोजी गरेर निक्षेप बढाउन नसक्दा राष्ट्र बैंकबाट एक साताको लागि लिने स्थायी तरलता सुविधा (एसएलएफ)मा मात्रै भर परेर कर्जा प्रवाह भएको देखिन्छ । यस्तो कर्जा प्रवाहले तरलता अभाव झनै चर्किने अनुमान गरिएको छ ।

बैैंकहरूले फागुनको पहिलो साता १ अर्ब निक्षेप बढाउँदा ४ अर्ब कर्जा प्रवाह गरेका थिए । यस्तो निक्षेप दोस्रो सातामा पनि जम्मा एक अर्ब रूपैयाँले मात्रै प्रवाह हुँदा कर्जा भने ६ अर्ब रूपैयाँले बढाएका छन् । 

हालसम्ममा वाणिज्य बैंकको प्रणालीमा ४३ खर्ब १३ अर्ब रूपैयाँ मात्रै निक्षेप संकलन भएको छ भने यो अवधिसम्मको कर्जा प्रवाह भने ४१ खर्ब ६५ अर्ब रूपैयाँ पुगेको छ । 

गत वर्षको फागुन महिनामा भने ४० अर्बले निक्षेप बढेको थियो । अहिलेसम्मको तथ्यांकअनुसार यो वर्ष भने सातामा १ अर्ब मात्रै बढ्दै गएका कारण एक महिनाको वृद्धिदर गत वर्षको तुलनामा निकै न्यून हुने देखिएको छ ।

यो अवधिसम्मको कर्जा निक्षेप अनुपात (सीडी रेसियो) ९०.८० प्रतिशत रहेको पनि बैंकर्स संघको तथ्यांकमा देखिन्छ ।