राष्ट्रिय सभा अध्यक्ष गणेशप्रसाद तिमिल्सिनाले राष्ट्रिय गौरवका आयोजनाहरूमा योजनाअनुसार काम भए देशले छिट्टै प्रगति गर्ने धारणा राखेका छन् ।

राष्ट्रिय सभाको राष्ट्रिय सरोकार तथा समन्वय समिति बैठकमा सोमवार सहभागी भएका अध्यक्ष तिमिल्सिनाले आयोजनाको काम समयमा चल्ने र योजनाअनुसार काम गर्ने बानीको विकास देश विकासमा योगदान पुग्ने बताए ।

समिति सभापति दिलकुमारी रावल थापा 'पार्वती'को अध्यक्षतामा सोमवार बसेको बैठकमा अध्यक्ष तिमिल्सिनाले योजनाअनुसार काम नभएको वा बदमासी भएको पाइएमा कारवाही र राम्रो काम गर्नेलाई पुरस्कारको सिफारिश गर्ने परम्परा बसाल्नुपर्ने बताए ।

बैठकमा देशभर चालू २३ वटा राष्ट्रिय गौरवका आयोजनाको कार्यप्रगति र समस्याबारे अध्ययन गर्न बनेका तीनवटा उपसमितिको प्रतिवेदन पेश र त्यसमाथि छलफल भएको थियो ।

अध्यक्ष तिमिल्सिना आजै राष्ट्रिय सभा अन्तर्गतका दिगो विकास तथा सुशासन समितिको बैठकमा पनि सहभागी भए ।

बैठकमा देशमा क्रियाशील राष्ट्रिय एवं अन्तर्राष्ट्रिय गैरसरकारी संस्थाका कार्यक्रमहरू एकद्वार प्रणालीअनुसार नियमन/सहजीकरण तथा अनुगमन र दिगो विकास लक्ष्य प्राप्तिका लागि गरेको योगदानबारे छलफल भएको थियो ।

त्यसक्रममा बोल्दै अध्यक्ष तिमिल्सिनाले सदस्यहरूलाई समितिमा हुने छलफलमा सक्रिय रूपमा सहभागी हुन अपिल गरे ।

'संसद् बैठक धेरै दिनपछि र थोरै समय मात्र बस्ने हुँदा सांसदहरूले काम नै गर्दैनन् कि भन्ने जनतामा परेको हुनसक्छ,' अध्यक्ष तिमिल्सिनाले भने, 'संसदमा बोल्ने समय पनि कम हुन्छ, त्यसैले समितिमा हुने छलफलमा सक्रिय रूपमा सहभागी हुन आग्रह गर्छु ।'

कोरोना महामारी र विभिन्न राजनीतिक गतिरोधका कारण संसद् बैठक नियमित बस्न नसकेको भन्दै अध्यक्ष तिमिल्सिनाले समिति बैठकमार्फत संसद् जीवित छ र काम गरिरहेको छ भन्ने देखाउनुपर्ने बताए ।

महिला बालबालिका तथा जेष्ठ नागरिक मन्त्री उमा रेग्मी समेत उपस्थित बैठकमा अध्यक्ष तिमिल्सिनाले राष्ट्रिय तथा अन्तर्राष्ट्रिय गैरसरकारी संस्थाले पारदर्शी ढंगले काम गर्नुपर्ने लक्षित समुदायमा कार्यक्रम पुगेको/नपुगेको बारे मन्त्रालयले अनुगमन गर्नुपर्ने बताए ।