नेकपा एमालेका अध्यक्ष केपी शर्मा ओलीले अमेरिकी आर्थिक सहयोग कार्यक्रम मिलेनियम च्यालेन्ज कर्पोरेसन (एमसीसी)बारे संसदले पास गरेको व्याख्यात्मक घोषणाको कुनै अर्थ नभएको बताएका छन् । 

प्रतिनिधि सभाबाट एमसीसी पारित भएको दुई दिनपछि मंगलवार पार्टीका शीर्ष नेताहरूलाई सँगै राखेर ओलीले सरकारले संसदबाट पारित गराएको व्याख्यात्मक टिप्पणीको कुनै अर्थ नहुने बताएका हुन् । 

‘एमसीसीलाई आईपीएसको अंग बनाइयो भन्ने हल्ला चलाइयो, सत्ता घटकका प्रमुख पार्टीका नेता (प्रचण्ड)को वक्तव्य सुन्यौँ, प्रदीप ज्ञवाली अमेरिका गएर एमसीसीलाई इण्डो प्यासिफिक स्ट्राटेजीकै अंग बनाइयो भनेर । अमेरिका भनिरहेको छ, आईपीएसको अंग होइन,’ ओलीले भने, ‘त्यो तथाकथित व्याख्याको कुनै अर्थ छैन । सहज र स्वस्थ ढंगले विकास परियोजनाको रुपमा नभई द्वन्द्व सिर्जना गर्न खोज्ने काम भयो ।’ 

एमालेले एमसीसी सम्बन्धमा नयाँ पाउडर लगाएर जनतालाई झनै अन्योल थप्ने काम गरेको आरोप लगाएको छ ।